XIV хороолол буюу “Нарантуул” захын ойр орчмын газрыг дахин төлөвлөсөн төслийг НИТХ-ын Тэргүүлэгчид баталлаа. Төслийг Хот байгуулалтын хөгжлийг дэмжих төвийнхөн гүйцэтгэсэн аж. Одоогийн байдлаар тус газарт 1459 өрх 235 га газрыг эзэмшиж буй аж. Энэхүү төлөвлөлтийг хийхийн тулд оршин суугчдынх нь саналыг үндэслэн зохиосон гэнэ.
Төсөл зохиогчдын хийсэн судалгаагаар оршин суугчдын 53.3 хувь нь газраа өгөөд нийтийн орон сууцтай болох, 15.7 хувь нь амины орон сууц барих, 15.1 хувь нь бусдын жишгийг дагах, 11.9 хувь нь газраа чөлөөлж өгөхгүй, 3.1 хувь нь орон сууцны болзлыг харгалзан шийдэх, 0.9 хувь нь хашаа байшингаа зарах саналтай байгаагаа мэдэгджээ. Тэдний энэхүү саналыг харгалзан хийсэн төлөвлөлтийн зургаар бол 9106 айлын 128 барилга баригдах гэнэ. Түүнчлэн таван цэцэрлэг, зургаан мянган хүүхдийн хүчин чадалтай сургууль, худалдаа үйлчилгээний зориулалттай барилга байгууламжууд баригдах аж. Түүнчлэн амины орон сууц барих хүсэлтэй байгаа иргэдийн саналыг харгалзан үзэж эзэмшлийнх нь газарт амины орон сууц байхаар төлөвлөсөн аж. Тиймээс энэхүү төлөвлөлт нь иргэдийн санал бодлыг тусгасан анхны төлөвлөлт болсноороо онцлог аж. Дэд бүтцийн хувьд гурван тэрбум гаруй төгрөг шаардлагатай юм байна. Энэ мөнгийг Барилга, хот байгуулалтын сайдын багцаас гарган хийх боломжтой аж. Тиймээс иргэд төдийгүй хөрөнгө оруулагчдад ашигтай төлөвлөлт болсон гэж НИТХ-ын Тэргүүлэгчид үзэж байна.