УИХ-ын гишүүн, Засгийн газрын гишүүн, Барилга хот байгуулалтын сайд, Үндэсний Шинэ Намын дарга Жанлавын Наранцацралт  Дундговь аймагт зохиогдсон аймгийн залуучуудын чуулга уулзалтад оролцож, УИХ, Засгийн газрын гишүүний үүрэгт албаа гүйцэтгэж яваад Улаанбаатар руу ирэх замдаа Төв аймгийн нутаг Айдасын давааны орчим автомашины ослын улмаас нас баржээ

Жанлавын Наранцацралт зуурдаар нас нөгчсөнтэй холбогдуулан Монгол Улсын Засгийн газар ээлжит бус хуралдаанаа 2007 оны арваннэгдүгээр сарын 13-ны өдрийн 02 цаг 30 минутад хийжээ. Хуралдааны эхэнд Засгийн газрын гишүүд талийгаачийн гэгээн дурсгалыг хүндэтгэн, 1 минут дуугүй зогсож, эмгэнэл илэрхийллээ.

Комиссын бүрэлдэхүүнд УИХ-ын Төрийн байгуулалтын байнгын хорооны дарга Д.Дондог, Засгийн газрын гишүүн Д.Одбаяр, М.Сономпил, Д.Туяа, С.Отгонбаяр, УИХ-ын гишүүн Н.Батбаяр, Ж.Батхуяг, Р.Раш, Нийслэлийн Засаг дарга бөгөөд Улаанбаатар хотын Захирагч Ц.Батбаяр, УИХ-ын Тамгын газрын ерөнхий нарийн бичгийн дарга Н.Лувсанжав, Дундговь аймгийн Засаг дарга Ш.Төрбат, Барилга, хот байгуулалтын дэд сайд Ц.Дашдорж, Гадаад хэргийн дэд сайд Ц.Цолмон, Монгол Улсын Ерөнхийлөгчийн зөвлөх Б.Намхайжанцан, Барилга, хот байгуулалтын яамны Төрийн нарийн бичгийн дарга Ц.Ганхүү, Тагнуулын ерөнхий газрын дарга Н.Ганболд, Цагдаагийн ерөнхий газрын дарга М.Ганболд, Төр, засгийн үйлчилгээ аж ахуйг эрхлэх газрын дарга Ж.Бадраа, Төрийн ёслолын албаны дарга О.Нямдаваа, Засгийн газрын Хэвлэл мэдээллийн албаны дарга С.Батбаатар нарын зэрэг хүмүүс багтжээ.

Жанлавын Наранцацралт нь 1957 онд Улаанбаатар хотод төрсөн. 1976 онд Беларусийн Улсын их сургууль, 1981 онд Москва хотын Газар зохион байгуулалтын их сургууль, 1990онд Монгол Улсын их сургууль төгссөн.

Тэрээр 1981-1989 онд ХААЯ-ны Газар зохион байгуулалтын институтэд инженер, ахлах инженер, ерөнхий мэргэжилтэн, 1989-1991 онд БОЯ-ны газрын бодлогын хүрээлэнд эрдэм шинжилгээний ажилтан, секторын эрхлэгч, 1991-1996 онд Улаанбаатар хотын АДХ-ын гүйцэтгэх захиргааны Хот байгуулалт, төлөвлөлтийн газарт хэлтэс, албаны дарга, тус хотын Захирагчийн албанд ахлах мэргэжилтэн, 1996 онд Нийслэлийн газрын харилцаа, үл хөдлөх хөрөнгийн бүртгэлийн албанд дарга, 1996-1998 онд Нийслэлийн Засаг дарга бөгөөд Улаанбаатар хотын захирагч, 1998-1999 онд Монгол Улсын Ерөнхий сайд, 1999-2000 онд МУИС-д багш, зөвлөх профессор, 2000, 2004 онд УИХ-ын гишүүнээр сонгогдон ажиллаж байна. 2004-2006 онд Байнгын хорооны даргаар сонгогдон ажиллаж байв. 2006 оны 1 сараас Барилга хот байгуулалтын сайдаар томилогдон ажиллаж байсан.

Наранцацралт нь Газар зохион байгуулагч-инженер, улс төр судлаач, нийгэм, эдийн засгийн газрын эрх зүйч мэргэжилтэй. Газар зүйн ухааны доктор. Монгол Улсын их сургуулийн зөвлөх профессор, Москвагийн Газар зохион байгуулалтын их сургуулийн хүндэт профессор байсан юм.

Монголын барилгын нэгдсэн вэб БАРИЛГА.МН-ий хамт олон

Ум сайн амгалан болтугай