Өвөрхангай аймгийн барилгачид барилгын байгууллага орон нутагт үүсч хөгжсөний хагас зуун жилийн ойг тэмдэглэж байна. 50 жилийн тэртээ тулгын чулуугаа чандмалсан тус аймгийн барилгын байгууллага 1990-ээд он хүртэл “Барилга угсралтын контор” гэгдэж мэргэжлийн 1200 гаруй ажиллагсадтайгаар үйл ажиллагаа явуулж тухайн үеийнхээ их бүтээн байгуулалтын тэргүүн эгнээнд явж байжээ. 1991 оноос зах зээлийн нийгмийн аясаар уг байгууллага олон жижиг компани болж задарч нэг үе уруудсан хэдий ч өнөөдөр үйл ажиллагаа нь сэргэж олон байгууламж шинээр барьж ашиглалтад өгч байгаа аж. Энэ байгууллагынхан түүхэн хугацаандаа орон нутагт 250-иад тэрбум төгрөгийн өртөг бүхий 350 орчим барилга байгууламж барьсан тооцоо байдаг юм байна.

 

Өнөөгийн байдлаар шинэ үүссэн компаниудаас “Ган нэгдэл” гэхэд л жилд нэг тэрбум орчим төгрөгийн барилга угсралтын ажил гүйцэтгэж байгаа бол “Эрхэс импекс” компани 131 сая төгрөгийн борлуулалт хийж “Цагаан бургалтай” ХХК энэ жил 430 сая төгрөгийн ажил гүйцэтгэхээр төлөвлөөд байгаа аж. Сүүлийн хоёр жилийн хугацаанд энэ аймгийн төв хөдөөд 24, 40, 60 айлын орон сууц, сургууль, цэцэрлэгийн олон байр баригдаж их засвар гүйцэтгэх ажил өрнөөд байна. Хагас зууны нүүр үзэж буй энэ аймгийн барилгын байгууллагын эхлэл 1959 оны дөрөвдүгээр сарын 20-нд МАХН-ын Төв Хороо, БНМАУ-ын Сайд нарын Зөвлөлийн хамтарсан тогтоолоор Хархорины сангийн аж ахуйн төвд “Барилга угсралтын анги” гэдэг нэрээр тавигджээ.

 

Монцамэ