Бизнес эрхэлнэ гэдэг залхуу юм уу, эрэгцүүлэн бодож янз бүрийн хувилбараар сэтгэдэггүй хүний хийдэг ажил биш гэж хүмүүсийн ярьдаг нь саяхан нэгэн бизнесментэй ярилцаж суухад чухам л үнэн юм даа гэж бодогдлоо. Энэ үгийн үнэнийг надад ухааруулсан тэр хүнийг А.Лхагвасүндэв гэнэ. Хөдөө нутагт бизнес эрхлэхээр хүсэл зориг шулуудсан тэрээр хэдхэн жилийн өмнө ажлын гараагаа эхэлсэн бол одоо хөл дээрээ босчихсон, нутгийн зон олондоо танигдсан ажил үйлчилгээ, бүтээгдэхүүнтэй “Ажнай цэгц” хэмээх компанийн эзэн болоод байна. Иргэд энэ компанийнхны халуун усанд тухлан орж үйлчлүүлнэ. 2000 тахиа үржүүлж аймгийн төвийнхнийг өдөр бүр шинэ найдвартай өндөг хэрэглэх бололцоотой болгосонд баярладаг. Үржүүлгийн газраас нь мод авч тарьсан иргэд, байгууллага богино хугацаанд эрчимтэй ургахаар ихээхэн урамшдаг боллоо. Бас барилгын вааран бүтээгдэхүүн үйлдвэрлэдэг цехтэй. Хаалга, замын хавтан, дулааны шугам сүлжээний цооногийн таг гээд хэд хэдэн төрлийн бүтээгдэхүүн хийдэг энэ цехийнхний барилгын дээврийн талаар хөдөө нутагт бизнес эрхлэгчдэд үлгэр дууриал болох зарим санааг энд өгүүлье.

 

 

“Ажнай цэц” компанийнхан 2006 оноос барилгын шахмал дээвэр үйлдвэрлэж эхэлсэн нь үр дүнгээ өгч одоо өөрийн гэсэн хэрэглэгчтэй болон олны талархал хүлээж байна.

-Байшингийн дээврийн үнэтэйг яана, бас холоос эрж хайж, олж ирэх ч түвэгтэй юм гэх ам дамжсан ярианаас үүдэн А.Лхагвасүндэв яавал орон нутагтаа үйлдвэрлэсэн хямд бүтээгдэхүүнээр иргэд, байгууллагад үйлчилж болох вэ хэмээн бодох болжээ. Бодоод зогсоогүй юугаар, яаж хэрхэн хийх вэ гэдгийг янз бүрийн аргаар сэтгэж, зарим хүмүүстэй санал солилцож, бас хэвлэл мэдээллээс санаа авах зүйл олж уншихыг зорьсон байна. Тэгээд байшингийн дээврийн вааран эдлэлийн аргаар шахмал байдлаар үйлдвэрлэхээр шийджээ. Түүнийг хийхэд ямар нэр төрлийн материалууд хэдий хэмжээгээр шаардлагатай, тэдгээрийн орц найрлага ямар байх талаар мэргэжлийн хүмүүсээс мэдээлэл авсан гэнэ. Энэ бүхнийхээ үндсэн дээр эвцэлдүүлэн бэхжүүлэх, нягтруулан хатууруулах зэрэгт нэн чухал ач холбогдолтой 6-7 төрлийн зүйлийг орц, найрлагад нь сонгон авч юу нь ямар хэмжээтэй байхыг тогтоосон. Өөрөөр хэлбэл, орц нормтой болж авсан байна. Тэдгээрийн нэлээдийг гаднаас захиалан оруулж ирдэг бол элс, ус, модны үйрдэс гээд орон нутийнхаа матеарилыг ч ашиглахаар болжээ. Дараа нь үйл ажиллагааны үе шат, ээлж дараалалд баримтлах горимтой болсон. Үйлдвэрлэсэн бүтээгдэхүүн чанартай, олон нийтийн санаа сэтгэлд нийцсэн байвал хэрэглэгчээ татан борлуулалт сайтай болж хөрөнгийн эргэлтийг хурдасгах замаар бизнес эрхлэлтийн үр дүнг дээшлүүлэх нэг нөхцөл бүрдүүлдгийг мэдэрсэн болохоор чанарт нь нэн их анхаарчээ. Монголчуудын дунд “яснаас хатуу, цаснаас цагаан” гэсэн үг байдаг нь чанарын нэгэн уламжлалт үнэлгээ болж иржээ. Үүний тулд тооцож тогтоосон орц хэмжээгээ чанд баримтлахыг эрхэмлэдэг. Энэ бүхнийг цехийн мастер А.Ганбат ажилчиддаа сайн зааж зааварлан явцад нь байнга хяналт тавьж ажилладаг байна.

Ингэж ажилладгийнхаа дүнд дээврээ “яснаас” хатуу бүтээгдэхүүн болгож чаджээ. Бүрэн хатаасны дараа нэг метр дээр нь 220 кг хүндийн жингээр даралт үзүүлэхэд эмтэрч цав суух, эвдэрч хэмрэхгүй болохыг мэргэжлийн хүмүүс тооцсон байна. Хэд хэдэн аймгуудын хамтран зохион байгуулсан нэгэн үзэсгэлэн худалдааны үеэр чанарыг туршиж үзэх гэж зарим хүмүүс дээр нь дэвсч, бас газар чулуудан хаяж үзээд үнэхээр бат бөхөд итгэсэн гэдэг. Эдний үйлдвэрийн бүтээгдэхүүнээр дээвэрлэсэн байшингаас Булганы түүхэнд урьд огт дуулдаагүй өнгөрсөн зуны 48 метр секундын хүчтэй салхинаар дээврийн нэг хавтан ховхорч ойролцоох байшин дээр хийсч эгц босоогоороо буухад аль аль нь эмтрээ ч үгүй байсныг хүмүүс дуулчихсан ярьдаг боллоо.

 

 

-Танай энэ бүтээгдэхүүн ямар давуу талтай вэ? хэмээн сонирхлоо. Компанийн захирал болон цехийнхэн давуу талуудаа олон шүү хэмээн хуруу даран тоолсоор 7-8 жишээгээр тайлбарлав. Юуны өмнө дээр дурдсанчилан чанартайн зэрэгцээ хөдөө орон нутагт борлуулагдаж байгаа дээврүүдээс хямд үнэтэй ажээ. Зарим зүйлийн үнэ хямд байхаар иргэдийн дунд “хулхи”, дууриамал л биз гэх яриа байдаг болохоор анх мөн л итгэж ядах хандлага байсан бол одоо эдэлж хэрэглээд чанарыг нь мэдэрч магтан ярьдаг боллоо. Тийм л сайн чанартай юм бол харин ч үнэтэй зарахгүй яаж байгаа хэрэг вэ гэх хүн ч мэр сэр дуулддаг. Арилжаа бизнес эрхэлнэ гэдэг өндөр үнэ ханшаар ашиг олохоос гадна хэрэглэгч олноо татах явдал чухал гэдгийг А.Лхагвасүндэв гол зарчим болгожээ. Энэ нь бүтээгдэхүүнийхээ борлуулалтыг түргэсгэн хөрөнгө санхүүгийнхээ эргэлтийг хурдасгах нэг боломж бүрдүүлж байна. Нөгөө талаар аймаг орон нутийнхаа иргэд, байгууллагын худалдан авах чадавхыг ч бодолцсоноороо давуутай ажээ.

Түүнчлэн одоогийн өргөн хэрэглэдэг төмөр дээвэртэй харьцуулахад хэд хэдэн сайн талтай, Тухайлбал, нэгд, хүчтэй салхи шуурганы үед дуу чимээгүй учир эзэмшигчдийг тав тухтай байдлыг хангана. Хоёрт, тэнгэрийн дуу, аянганаас цахилгаан татахгүй. Гуравт, зуны халуунд байшингийн дээвэрт хэт их халаалт үүсгэхгүй, өвлийн цагт дулааныг зохих хэмжээгээр барихын зэрэгцээ төмөр дээвэртэй адил хүйтэн нэвтрүүлэх нь бага. Дөрөвт, төмөр дээврийн өнгө бараг нэг зуны наранд гандан цайж дахиад л будах ажил гардаг бол энэ дээвэрт тийм хөрөнгө, хөдөлмөр илүү зарахгүй. Тавд, төмөр дээвэр бороо цасны усанд зэврэн нимгэрч цоордог бол энэ дээвэр хэдэн арван жил ч хэрэглэхэд тийм явдал гарахгүй.

Өөр нэг давуу тал нь аймгийнхаа иргэд байгууллагууд орон нутагтаа үйлдвэрлэсэн бүтээгдэхүүнээр хангагдах нөхцөл бүрдүүлснээрээ ашигтай гэж хүмүүс үнэлдэг болжээ. Энэ нь тэд эрж сураглах, тээвэрлэн авчрахын бэрхшээлд ордоггүйн зэрэгцээ бага багаар нь цувуулан авч тааруулах бололцоотой. Мөн захиалан авч болно. Захиална гэдэг нь хэрэглэх хэмжээ, авах хугацаагаа тохирохоос гадна ховилтой буюу шипрэн хэлбэрээр, мөн тэгш гадаргатайгаар ч хийлгүүлж болно гэсэн үг.

 

 

“Ажнай цэгц”-ийнхан энэ дээврээ үйлдвэрлэн гаргачихаад хэзээ, хэн хаанаас ирж авах бол хэмээн харж суулгүй өөрсдөө ихээхэн хүчин чармайлт гарган хичээн зүтгэцгээдэг. Тус үйлдвэрийн борлуулалт хариуцсан менежэр А.Бат-Эрдэнэтэй уулзахад:

-Бид бүтээгдэхүүнээ олон нийтэд сайтар сурталчлахыг эрхэмлэдэг. Орон нутгийн мэдээллийн хэрэгслээр танилцуулна. Үзэсгэлэн худалдаанд оролцож сурталчлан борлуулдаг. Барилгын зураг төсөв гүйцэтгэдэг, үйлдвэрлэл эрхэлдэг компани, барилга байшин бариулах байгууллага, иргэдийг тандан мэдэж бүтээгдэхүүнээ авч хэрэглэх санал тавьдаг хэмээн ярьж байв.

Тус аймгийн зэргэлдээх барилгын үйлдвэрлэл Эрдэнэтэд харьцангуйгаар эрчимтэй явагддаг тул гол хэрэглэгчээ тэднээс олох зорилго тавьдаг ажээ. Тухайлбал, үйлдвэрлэсэн дээврээсээ ачиж очоод зарим байгууллага, гэр хорооллын иргэдэд биечлэн үзүүлж чанар, давуу талуудаа хэлж өгдөг. Зах дээр байрлуулж үзэж сонирхсон хүмүүсийн санал захиалгыг авдаг. Хүсэлт тавьсан иргэд байгууллагад өөрсдөө хүргэж өгнө. Ингэж үйлчилснийхээ тээврийн зардлыг үнэнд нь шингээлгүйгээр үйлдвэрийн зарлага болгодог ажээ. Бизнес эрхэлж үйлдвэрлэсэн бүтээгдэхүүнээ зах зээлд богино хугацаанд борлуулна гэдэг ийнхүү ихээхэн овсгоо самбаа, арга эв шаардсан ажил байдгийг эднийхний жишээнээс харж болно.

Энэ үйлдвэрлэлийг эрхлэхэд хүндрэл бэрхшээл тулгардаг ч гэсэн орон нутагтаа үйлдвэрлэсэн чанартай хямд бүтээгдэхүүнээр үйлчлүүлэгчээ татах тэмүүлэлд хөтлөгдсөн Булган хангайн бизнесмен А.Лхагвасүндэв энэ үйлдвэрээ тусгай байртай болгох гэж байна. Үйлдвэрлэлээ ч өргөтгөнө гэж зорьж яваа ажээ. Өвөг дээдэс маань өргөө гэрийнхээ дээвэр туурганы эсгийг хийж байгаа хүмүүстэй уулзаад “Яснаас хатуу, цаснаас цагаан эсгийтэй болоорой” хэмээн ерөөдөг байсан гэдэг. Тэр ерөөлийг “Ажнай цэгц” компанийн барилгын вааран материалын үйлдвэрийнхэнд дэвшүүлж хөдөө орон нутагт бизнес эрхлэгчдэд хүргэх энэхүү мэдээллээ өндөрлөе.

 

 

Монцамэ