Та бүхэнд шинэ оны мэнд дэвшүүлж, 2018 онд амжилт бүтээлээр дүүрэн байхын өлзийтэй ерөөл дэвшүүлье.

   Улиран өнгөрсөн 2017 он манай Холбооны хувьд 10 жилийн ойн жил байлаа. Бид энэхүү түүхт ойн жилдээ зориулж гишүүд та бүхнийхээ дэмжлэгтэйгээр олон ажлыг амжилттай хэрэгжүүлж ажиллаа. Бид уламжлалт Спорт наадам, Барилгачдын баярын Ахмадын хүлээн авалт, Шинэ оны цэнгүүн зохион байгуулснаас гадна БЗТЗХолбооны 10 жилийн ойг тохиолдуулан холбооны түүхийг харуулсан ном, баримтат киног бүтээлээ. Цаашид 5 жил тутамд Холбооны түүхийг харуулсан ном, киног бүтээх болно.

   2017 онд “Барилга байгууламжийн төвөгшлийн ангилалд хамаарах зориулалт, хүчин чадлыг тогтоох дүрэм”, “Барилгын эталон зураг”, “Барилгын эталон зургийг хэрэглэх заавар”-ыг батлуулж, холбогдох сургалтууд зохион байгуулсан. Энэ нь зураг төслийн нийт байгууллагын зургийг стандартын дагуу боловсруулах боломжийг нээж өгсөн.

   2017 онд манай Холбооноос мэргэжлээрээ олон жил үр бүтээлтэй ажиллаж, салбарын хөгжилд дорвитой хувь нэмэр оруулсан олон инженер, архитекторуудыг тодруулж төрийн одонгоор шагнууллаа. Хөдөлмөрийн гавъяаны улаан тугийн одонгоор шагнагдсан инженер Ч.Бүргэдээ, Б.Баасанжав, Ж.Шажинбат, Г.Сарантуяа, А.Эрдэнэчимэг нар, Алтан гадас одонгоор Р.Нямжав, А.Цогт, Д.Намсрай, О.Цэдэнбаатар, С.Цэмбэлдорж, Ц.Шараа, Л.Эрдэнэтуяа, Ж.Амгалан, Ж.Амарсанаа, Б.Ванчигмаа, Ө.Ганболд, Д.Долсонжав, Ц.Жалцав, Д.Намсрай, Ё.Нацагмаа, Л.Өнөрбилэг, С.Эрдэнэцэцэг нартаа нийт гишүүдийнхээ өмнөөс баяр хүргэж, эрүүл энх, сайн сайхан бүхнийг хүсэн ерөөе.

   2017 онд манай Холбоо барилгын ажилтны мэргэжил дээшлүүлэх чиглэлээр инженерийн зэрэг дэв олгож буй тогтолцоог сайжруулахын төлөө идэвхитэй ажилласан. 2017 оны 1-р улиралд мэргэжил дээшлүүлэх сургалтыг сайжруулах тухай хэлэлцүүлэг зохион байгуулж, БХТөв, БХБЯамтай хамтран ажилласнаар БХБСайдын 2017 оны 12 дугаар сарын 08-ны 200 дугаар тушаалаар “Барилгын салбарын ажилтны давтан сургалт, мэргэшлийн зэрэг олгох дүрэм” шинэчлэгдэн батлагдлаа. Энэхүү дүрмийн дагуу мэргэшсэн инженер горилогчид бүгд 1-р шатанд тестийн шалгалт, 2-р шатанд ур чадварын шалгалт өгдөг болсон. Ингэснээр мэргэжлийн ур чадварыг бодитой үнэлэхэд дорвитой ахиц гарах юм.

   2017 онд БХБСайд МБНХолбоо тэргүүтэй ТББ-уудад мэргэжил дээшлүүлэх сургалтыг хэрэгжүүлэх эрхийг олгосон тушаал гаргасан нь бид энэ ажилд шууд оролцох сайхан боломж бүрдүүллээ. Иймд ирэх 2018 онд манай зураг төслийн инженерүүдийг чадавхижуулахад чиглэсэн бүтэн жилийн хөтөлбөрийг боловсруулаад байгаа ба үүнийхээ дагуу ажиллах болно.

   БХБСайдын 2017 оны 12 дугаар сарын 28-ны 216 дугаар тушаалаар барилгын салбарт “Тусгай зөвшөөрөл олгох” чиг үүргийг МҮБА тэргүүтэй ТББ-уудад гэрээгээр гүйцэтгэхээр шийдвэрлэсэн. Ингэснээр тусгай зөвшөөрөл олгох ажлыг жинхэнэ утгаар нь шударга, ил тод явуулах нөхцөл бүрдлээ.

   Манай Холбоо зураг төслийн тусгай зөвшөөрөл олгох ажлыг сайжруулахад  идэвхитэй оролцож ажиллаж байна. Дээр дурьдсан БХБСайдын 2 тушаалын хэрэгжилт бидний энэ оны ажлын гол чиглэлийг тодорхойлж өгсөн. Иймд бид бүгд Холбоогоо дэмжиж, хөгжлийн дараагийн шатанд гаргах ажлаа амжилттай хэрэгжүүлэх шаардлага тулгарч байна.

   БЗТЗХ-ны 2017 оны ажлыг амжилттай зохион байгуулж ажилласан Гүйцэтгэх захирал А.Батцэнгэл, Зөвлөх Г.Сарантуяа, ажлын алба болон Удирдах зөвлөл, Хяналтын зөвлөлийн нийт гишүүддээ бүх гишүүдийнхээ өмнөөс гүн талархал илэрхийлж, сайн сайхан бүхнийг хүсье.

   Миний бие 2015 оноос Холбооны Ерөнхийлөгчөөр сонгогдон ажиллаж байгаа бөгөөд энэ онд Холбоогоо бэхжүүлэхийн төлөө идэвхи зүтгэл гарган ажиллана. Манай Холбооны дүрмийн дагуу 2019 онд Ерөнхийлөгчийн сонгууль явагдах тул та бүхнийг одооноос бэлтгэж, ирэх сонгуульд оролцохыг урьж байна.

Барилгын салбарын хөгжил зогсолтгүй хурдан байх болтугай.

Барилгын зураг төсөл зохиогчдын холбооны ерөнхийлөгч Н.Дорж