Зам тээвэр, Барилга, хот байгуулалтын яамнаас «Барилгачдын баяр»-ыг тэмдэглэн өнгөрүүлэх ажлын хүрээнд салбарын үе үеийн сайд, одоогийн УИХ, Засгийн газрын гишүүдийн төлөөлөл, төрийн болон томоохон төрийн бус байгууллага, хувийн хэвшлийн удирдлагуудын төлөөлөл оролцсон «Бүтээн байгуулалт- Хөгжил дэвшил» сэдэвт уулзалтыг өчигдөр зохион байгууллаа. Энэхүү уулзалтын гол ач холбогдол нь барилгын салбарын хөгжил дэвшил, ололт амжилт, одоогийн Засгийн газраас барилгын салбарт баримталж буй бодлого, авч хэрэгжүүлж буй арга хэмжээний талаар нэгдсэн ойлголт өгөх, цаг үеийн хямралаас гарах гарцуудыг хамтран тодорхойлох байлаа.

 

«Монгол Улсын Засгийн газраас дэвшүүлж буй зорилтууд, бодлогын асуудлууд», «Үнэт цаасны 2 дахь зах зээлийн тогтолцооны ач холбогдол, хөрөнгө оруулалтын таатай нөхцөл бүрдүүлэх боломжууд», «100 мянган орон сууц төсөл, түүнийг хэрэгжүүлэх арга зам», «Жишиг сумын төв» зэрэг сонирхолтой илтгэлийг уулзалтын үеэр тавьсан юм. Зам, тээвэр, барилга хот байгуулалтын сайд Х.Баттулга уулзалтыг нээж үг хэлсэн юм. Тэрбээр, “манай улсын барилгын салбарт нэг триллион төгрөг түгжигдчихээд байна. Засгийн газраас барилгын салбар дахь хямралыг давах анхны хөрөнгө оруулалт болох 200 тэрбум төгрөгийг ойрын хугацаанд хэлэлцэн шийднэ. Барилгын салбарт тулгамдаж буй олон бэрхшээлтэй асуудал бий. Үүнээс хэрхэн давж гарах аргыг удирдах ажилтнууд бид олж хэрэгжүүлэх ёстой. Өнөөдрийн уулзалтад хүрэлцэн ирсэн та бүхэн бидний ажилд үнэтэй зөвлөгөө өгч, харилцан зөвшилцөнө гэж найдаж байна” гэлээ. Мөн энэ үеэр УИХ-ын гишүүн О.Чулуунбат «Үнэт цаасны 2 дахь зах зээлийн тогтолцооны ач холбогдол, хөрөнгө оруулалтын таатай нөхцөл бүрдүүлэх боломжууд» илтгэлийг тавилаа. Тэрбээр илтгэлдээ“хөгжиж байгаа улс, орнуудын барилгын салбар хамгийн түрүүнд өндөр хөгжсөн байдаг. Тиймээс манай улс энэ салбараа хөгжүүлэхийн тулд анхаарах ёстой.

 

Барилга баръя, байртай болъё гэхээр манай улсын өөрийн үндсэн хөрөнгө, хуримтлал маш бага байдаг нь хүндрэлтэй байдаг. Хуримтлал таван хувь байснаас долоо руу шилжиж байгааг судалгаа харуулж байна. Гэхдээ бид 5-7 хувийн хуримтлалаар байртай, барилгатай болно гэдэг хэдэн зуун жилийн мөрөөдөл болж байгаа юм. Хурдан хугацаанд их баялагтай болох арга нь ашигт малтмал. Харин бид энэ алхмыг хийж чадсан. Удаан хугацааны туршид ярьж байж стратегийн орд газрыг ашиглах, эргэлтэд оруулах боломжийг бий болголоо.

Монгол Улс өөрөө хуримтлалтай болж хоёр дахь зах зээлийн боломжийг нээж байгаа хэрэг. Энэ намрын чуулганаар бид Хөрөнгөөр баталгаажсан үнэт цаасны тухай хуулийг батлуулахаар ажиллах болно” гэдгийг дурдлаа.

 

Монцамэ