Хаваржин нэмэгдсэн цементийн үнэ ахиад өсөх бололтой. Учир Улаанбаатарын ачих буулгах тээврийн экспедицийн механикжсан ангид 400, Толгойт дахь ачих буулгах өртөөн дээр 100 орчим вагон саатсан байгаа гэнэ. Энэ нь тус байгууллагын үйл ажиллагаанд нэлээн хүндрэл учруулж байгаа аж. Бөөгнөрсөн ачаагаа хот руу зөөж чадахгүй байгаагийн улмаас Замын үүдээс хот руу орж ирэх ачааны вагон орж ирж чадахгүй саатаад байна. Энэ сарын 10-20 –ны хооронд нэг мянга гаруй вагон ачаа буюу 70 мянга гаруй тонн ачаа хил дээр бөөгнөрсөн гэсэн тоо байна. Тиймээс цементээ буулгалгүй ачааны вагон 10 гаруй компанид мэдэгдэх хуудас хүргүүлсэн байна. Тухайлбал “Сумо интернейшнл” ХХК 76 гаруй вагон, “Чичин од” ХХК 32 вагон ачааг 6-7 хоног саатуулаад байна. Эзэд утсаа салгаад амраад явчихсан олдохгүй байгаа гэнэ. Улаанбаатар ачих буулгах ангиас эдгээр аж ахуй нэгжүүдэд нэн яаралтай вагоноо суллаж өгөхийг шаардаж байгаа юм. Түүнчлэн вагон саатуулсний төлбөр тавьж, ачилтын хөлсөө 2-3 дахин нэмэх, торгууль тооцохоор болсон байна. Замын Үүд өртөөнд наадмын өмнөх өдрүүдэд ачаа бөөгнөрч төмөр замын ачилт, вагон эргэлтэнд асар их ачаалалтай байсан. Энэ үед УБТЗ шуурхай комисс байгуулж Эрээн өртөөн дээр өөрийн зарим вагондоо ачилт хийсэн. Ердийн үед хоногт 156 вагон ачдаг байсныг 220 вагон болгож өсгөж ажилласан. Мөн талбайд ажилладаг гэрээт ажилчдын тоог 120 болгон ачилтыг 50 хувиар өсгөсний үр дүнд тав хоногт 1050 вагон ачааг хот руу ачуулж бөөгнөрөлийг багасгажээ. Гэсэн ч одоо эргээд ачаалал нэмэгдэж байна гэж Төмөр замын удирдах газраас мэдэгдсэн.