«Алтай-Улиастайн эрчим хүчний систем» /АУЭХС/төрийн өмчит хувьцаат компани цахилгаан дамжуулах тусгай зөвшөөрөл авах хүсэлтээ Эрчим хүчний зохицуулах газарт тавиад байна. Тус компанийн хүсэлтийг Эрчим хүчний зохицуулах газар энэ долоо хоногт эцэслэн шийдвэрлэх юм.

 

2008 оны 6 дугаар сард Засгийн газрын тогтоолоор байгуулагдсан тус компанид Говь-Алтай аймгийн Тайшир, Гуулин, Завхан аймгийн Богдын гол, Тосонцэнгэл, Цэцэн-Уул, Завханмандалын усан цахилгаан станцууд, Цээл, Бугатын нар, салхи хосолсон цахилгаан станцууд, дээрх аймгуудын нутаг дахь цахилгаан дамжуулах 35-110 кВ-ын цахилгаан дамжуулах агаарын шугам, дэд өртөөнүүдээс бүрдсэн цахилгаан дамжуулах шугам сүлжээнүүд харъяалагдах юм.

 

 Алтай-Улиастайн эрчим хүчний системд Говь-Алтай аймгийн Баян-Уул, Бигэр, Дарви, Шарга, Есөнбулаг зэрэг 14, Завхан аймгийн Асгат, Баянтэс, Завханмандал, Идэр, Улиастай зэрэг 20, нийт 34 сум холбогдох ажээ. 2007-2008 онд улсын төсөв болон Монгол Улсыг хөгжүүлэх сангийн хөрөнгөөр дээрх 34 сумыг Алтай-Улиастайн эрчим хүчний системд холбох 2000 шахам км шугам, 47 дэд станцаас бүрдсэн цахилгаан дамжуулах, түгээх шугам сүлжээ барьж, 32 тэрбум төгрөг зарцуулсан ч Тайширын станц хугацаандаа ороогүй тул одоогоор шугам дэд станцыг ашиглалтад хүлээн авах боломжгүй байгаа юм.

 

 «Тайшир»-ын усан цахилгаан станц, эндээс Говь-Алтай, Завхан аймгийн төв хүртэлх агаарын шугам, дэд өртөө барих ажил 2004 онд эхэлж, өнгөрсөн оны 7 дугаар сард дууссан боловч туршилт тохируулгын ажил удааширч байгаагаас ашиглалтанд бүрэн аваагүй байгаа бөгөөд одоогоор тэнд Улсын комисс ажиллаж байна юм.

 

Монцамэ