Газар төлөвлөлтөө буруу хийж айлуудад зөвшөөрөлгүй газар олгож тэр нь эргээд иргэдэд хүндрэл учруулж, нүүх шаардлага тавиад байгаа тухай «Экологи Зайсан» төрийн бус байгууллагынхан хэвлэлийнхэнд мэдээллээ. Хан-Уул дүүргийн 11 дүгээр хорооны 14 айлын газрын бичгийг Хан-уул дүүргийн засаг даргын албыг дөрвөн сар хашиж байсан Занданбат «Монос» группт хууль бусаар шилжүүлсэн байна.

 

Өнгөрсөн долдугаар сараас эхлэн «Монос» групп эдгээр айлаас нүүхийг удаа дараа шаардаж, энэ сарын 5-ны өдөр «Цагаан бар» хамгаалалтын албаныхан 100 гаруй хамгаалагчтай ирж айлуудын хашааг нурааж, иргэдийг зодож танхайрсан байна. Энэ үеэр жирэмсэн эмэгтэйг чирч гавлаж, тэрэгтэй хүүхдийг түлхэж, хөгшдийг өшиглөж, хоёр хүний дөрвөн шүдийг өшиглөж хугалсан байна. «Цагаан бар» хамгаалалтын албаны хүмүүс дотор Боловсролын их сургуулийн биеийн тамирын багшийн ангийн оюутнууд байсан бөгөөд тэд зодооны үеэр бичиг баримтаа гээжээ. Иргэний үнэмлэх, сурлагын дэвтэрээ гээсэн оюутныг бичиг баримтаа авахыг хүссэн. Цагаан бар хамгаалалтын албаны дарга Чинзориг NTV телевизэд өгсөн ярилцлагадаа бид энэ хүмүүсийг нүүлгэхийн тулд нохой адгуус, буу зэвсэг ч хэрэглэнэ гэж ярьжээ.

 

Хан-Уул дүүргийн нутагт «Монос-14», «Мөнгөн-капитал-3», «Гантулга-бор-25» гэсэн гурван компани газар эзэмших эрх авахаар хөөцөлдөж энд 200-гаад иргэний эрх ашиг зөрчигдөх болоод байна. Эдгээр компани иргэдийг нүүлгэхдээ шүүхэд хандаж дархан цаазат газар буух ёсгүй гэж зарга үүсгэдэг байна. Энэ сарын 11-нд «Мөнгөн капитал» ХХК-ийн захиргааны хэргийн шүүх, 21-нд «Гантулга-бор» ХХК-ийн хурал болно. Зайсангийн амны айлуудыг аялал жуулчлалын дархан цаазат газарт байлгахгүй гэсэн шалтгаанаар нүүлгэдэг ч баячууд нь өндөр том байшин бариад сууж байдаг чинь шудрага явдал мөн үү хэмээн иргэд бухимдаж байгаа тухай «Экологи-Зайсан» төрийн бус байгууллагын тэргүүн Ц.Өнөржаргал яриад энэ компиануудыг Авлигатай тэмцэх газар өгч шалгуулж байна, Өнөөдөр бид Монгол Улсын Ерөнхийлөгчийн хуулийн зөвлөх Ганзоригтой уулзана гэв.

 

Монцамэ