Монголын Ипотекийн Корпорацын шинэ байрны нээлт, бонд худалдах гэрээнд гарын үсэг зурах ёслол 2009 оны 9 сарын 18-нд боллоо. Уг арга хэмжээ нь иргэдийг орон сууцжуулахад ихээхэн ач холбогдолтой юм. МИК 25 тэрбум төгрөгөөр 2 хэсгээр эхний ээлжинд 10 тэрбум төгрөгийн бондыг 1, 3, 5 жилээр, дараагийн ээлжинд 15 тэрбум төгрөгийн бондыг 3, 5 жилээр тус тус гаргах гэж байна. Олон улсын туршлагаас харахад ипотекийн зах зээлийг зөв, эрүүл хөгжүүлэхэд хоёрдогч зах зээлийн байгууллага маш чухал үүрэг гүйцэтгэдэг бөгөөд манай улсын хувьд энэхүү зах зээл дөнгөж шинээр үүсч байгаа хэдий ч ийм төрлийн байгууллагыг зөв голдрилоор хөгжүүлэх таатай орчин бүрдсэн нь МИК-ийн үйл ажиллагаа их ирээдүйтэй болохыг харуулж байна. Монгол улсад ипотекийн хоёрдогч зах зээлийг хөгжүүлэх нь эдийн засаг дахь мөнгийг хэрэгцээтэй байгаа салбарт нь шилжүүлэн эргэлтийг сайжруулах, банк санхүүгийн салбарт шаардлагатай эх үүсвэрээр хангах улмаар зогсонги байдалд орсон орон сууцны санхүүжилтийн зах зээлийг хөдөлгөх боломжийг бий болгох юм.

Монгол банкны Ерөнхийлөгч Л.Пүрэвдорж, Санхүүгийн зохицуулах хорооны дарга Д.Баярсайхан, ХХБанкны Ерөнхийлөгч, МИК-ын ТУЗ-ын дарга Рандолф С.Коппа, МИК-ын гүйцэтгэх захирал Ц.Энхбаяр нар үйл ажиллагааны нээлтийн туузыг хайчиллаа.

МИК-ын 1 тэрбум төгрөгийн бондыг Капитрон банк, тэрбум төгрөгийн бондыг ХХБанк, 4 тэрбум төгрөгийн бондыг Хас банк худалдан авахаар гэрээ хийлээ.

Үйл ажиллагаанд Монгол банк, СЗХороо, Сангийн Яам, ХХБанк, Хас банк, Капитрон банк, Тэнгэр санхүүгийн нэгдэл, Барилга.МН БЗМТ, Батс Инвест ХХК-ийн төлөөлөгчид оролцлоо.