Улаанбаатар хот үүсгэн байгуулагдсаны 370 жилийн ойд зориулав

Улаанбаатар-Москва хотуудын өнөөгийн харилцаа нь 1996 онд Нийслэлийн Засаг дарга бөгөөд Улаанбаатар хотын захирагч Ц. Баасанжав, Москва хотын дарга Ю.М Лужков нарын Москва хотод гарын үсэг зурсан "Улаанбаатар Москва хот хоорондын найрсаг харилцаа, хамтын ажиллагааны тухай протокол”-д тулгуурлан явагдаж байна. Уг протоколын дагуу хоёр хотын харилцаа бүхий л салбарт эрчимтэй хөгжиж байгаа бөгөөд үүнд Улаанбаатар хотод 340 айлын орон сууц бүхий "Москва” хорооллыг барьж байгуулах асуудал хоёр удирдлагын түвшинд тохиролцон ажлын хэсгүүд ажлаа эхэлсэн билээ. Уг хорооллын барилгын асуудлыг Улаанбаатар хот шийдсэн ба хөрөнгийн эх үүсвэрийг Москвагийн тал шийдсэн.

Улаанбаатар хотын банк болон Москва банкны хооронд корреспондент банкны харилцаа тогтоож хоёр хотын төр, захиргааны байгууллагуудын ажилд дэмжлэг үзүүлж байхаар хоёр банк тохиролцов. Хоёр хотын харилцаанд түлхэц болсон томоохон арга хэмжээ нь 2000 онд Улаанбаатар хотод Москвагийн өдрүүдийг, 2001 онд Москва хотод Улаанбаатарын өдрүүдийг тус тус зохион байгуулсан явдал юм. Уг арга хэмжээ нь хоёр хотын төдийгүй хоёр улсын ард түмний найрамдлыг бэхжүүлж, харилцан ойлголцлыг гүнзгийрүүлэх, соёл, урлаг, эдийн засгийн салбарын харилцааг хөгжүүлэхэд ихээхэн чухал үүрэг гүйцэтгэсэн гэж хоёр хотын удирдлага дүгнэсэн байна.2001 оны 10-р сард Нийслэлийн Засаг бөгөөд Улаанбаатар хотын Захирагч М. Энхболд, Москва хотын дарга Ю.М.Лужков нар "Улаанбаатар, Москва хотууд хоорондын 2002-2004 оны хамтын ажиллагааны хөтөлбөр”-т гарын үсэг зурсан бөгөөд уг хөтөлбөрт тусгагдсан хамтын ажиллагааны чиглэл тус бүрээр холбогдох байгууллагууд ажиллаж байна.

Улаанбаатар-Хөх хот-ын хооронд анх 1991 онд Улдаанбаатар хотын АДХ-ын гүйцэтгэх захиргааны дарга асан Л. Энэбиш тэргүүтэй төлөөлөгчид Хөх хотод айлчилж Ах дүү хотын харилцаа тогтоох тухай албан ёсны баримт бичигт гарын үсэг зурсан байна. Yүнээс хойш хоёр хотын бүх талын хамтын ажиллагаа өдрөөс өдөрт өргөжин тэлсээр байна. Багш боловсролын ажилтнууд харилцан айлчилж туршлага солилцох, багш сурагчид солилцож сургах, сургуулиудын хооронд хамтын ажиллагааны шууд харилцаа тогтоох зэргээр боловсролын салбарт өргөн хүрээтэй хамтын ажиллагааг явуулж байна. Эмч эмнэлгийн ажилтнуудыг Хөх хотын эмнэлэг, эмнэлгийн сургуулиудад хамруулах, харилцан туршлага судлах зэргээр эрүүл мэндийн салбарт мөн эрчимтэй харилцаж байна. Хөх хотын эмнэлгийн байгууллагад оношлогоо, эмчилгээ хийлгэж буй Улаанбаатарын иргэдийн тоо улам бүр өсөж байна.

Хоёр хотын захиргаанаас аж ахуйн нэгжүүдийн хооронд харилцаа тогтооход дэмжлэг үзүүлэх, зуучилж өгөх, хоёр хотын ажил хэрэгч хүмүүсийн дунд бизнес уулзалт, дугуй ширээний ярилцлага, бараа бүтээгдэхүүн, шинэ технологийн үзэсгэлэн худалдаа зохион байгуулах зэргээр эдийн засгийн салбарын хамтын ажиллагаанд ихээхэн ач холбогдол өгч ажиллаж байгаа билээ. Засаг захиргааны чиглэлээр мөн хамтран ажиллан,төрийн захиргааны байгууллагын ажилтан солилцон туршлага судлах, хотынхоо иргэдийн эрх ашигт нийцсэн үйл ажиллагаа явуулах, иргэдэд түргэн шуурхай үйлчлэх ажлын арга барилын шинэ дэвшилтэт хэлбэрүүдийг судлан суралцах зэрэгт анхаарлаа хандуулж байна. Улаанбаатар хотын 9 дүүрэг Хөх хотын 9 дүүрэг, засаг захиргааны нэгжтэй шууд харилцаа тогтоон өргөн хүрээтэй хамтын ажиллагаа явуулж эхлээд байна.

2001 онд хоёр хотын хооронд ах дүүгийн найрамдалт харилцаа тогтоосны 10 жилийн ойг хамтран тэмдэглэн өнгөрүүлсэн бөгөөд энэ үеэр Улаанбаатар хотод Хөх хотын өдрүүдийг зохион байгуулсан билээ. Мөн Улаанбаатар хотын захиргааны төлөөлөгчид жил бүр Хөх хотноо зохион байгуулагддаг "Жао Жун” хатны урлаг соёлын наадамд оролцдог болсон.

1995 оны 10 дугаар сарын 6-ны өдөр Улаанбаатар хотноо Улаанбаатар, Сөүл хотуудын хооронд Ах дүү хотын харилцаа тогтоох тухай тунхаглалд Улаанбаатар хотын Засаг дарга Ц. Баасанжав, Сөүл хотын дарга Жо Сүн нар гарын үсэг зурснаар хоёр хотын өргөн дэлгэр хамтын ажиллагаа эхэлсэн.Хот байгуулалт, хотын аж ахуйн олон талт салбарт эрх тэгш, үр ашигтай хамтын ажиллагаа хөгжүүлэх боломжийг хоёр тал судлан харилцан сонирхож буй салбарт өргөн хүрээтэй харилцааг бэхжүүлэхэд харилцан дэмжлэг үзүүлж ирлээ.

Хоёр хотын хооронд эдийн засаг, худалдаа, соёл, шинжлэх ухааны салбарт хамтран ажиллаж, захирганы үйл ажиллагааны туршлага, мэдээлэл солилцож, холбогдох төрийн байгууллагын ажилтнуудыг харилцан айлчлуулан суралцуулж байна. Мөн боловсрол, аялал жуулчлал, спортын салбарт хамтран ажиллаж, оюутан сурагчид, хүүхэд залуучуудыг харилцан солилцдог уламжлалтай болоод байгаа. Сөүл хотноо манай улсын хүүхэд залуучуудыг боловсрол эзэмшүүлэх, мөн залуучуудад мэргэжлийн дадлага хийлгэх, тэднийг ажиллуулах зэрэг ажлууд эрчимтэй явагдаж байгаа юм. 2001 онд Улаанбаатар хотноо Сөүл хотын нэрэмжит гудамжийг Сөүл хотын хөрөнгө оруулалттайгаар байгуулсан юм.2005 онд Улаанбаатар, Сөүл хотууд ах дүү хот болсны 10 жилийн ой тохиож 2005 оны 5 сард Сөүл хотноо Улаанбаатарын өдрүүдийг, 9 сарын 5-9-ний өдрүүдэд Улаанбаатар хотноо Сөүлийн өдрүүдийг амжилттай зохион байгуулж уг өдрүүдийн үеэр хоёр хотын ард түмний амьдрал, соёл урлаг, зан заншлыг харилцан таниулж, шинэ дэвшилтэт технологийг ард түмэндээ таниулах, тэднээс үргэлжлүүлэн суралцах зэрэг төрөл бүрийн өргөн хүрээтэй арга хэмжээнүүдийг зохион байгууллаа.

Нийспэлийн Засаг дарга бөгөөд Улаанбаатар хотын захирагч Ц.Батбаяр БНСУ-ын Инчон хотын Иргэдийн хурлын дарга Ан Сои Сүг дагалдан яваа төлөөлөгчдийн хамт өчигдөр хүлээн авч уулзлаа. 2014 онд болох Азийн спортын тоглолтыг өөрийн хотдоо зохион байгуулах саналыг Инчионаас тавиад байгаа.

Монгол улс Инчион хотод Азийн наадмыг зохион бзйгуулах саналыг дэмжиж буйд тус хотынхон баяртай байдгаа ноён Ан Сон Сүг уулзалтын үеэр илэрхийлсэн. Хоёр хотын хамтын ажиллагаа олон салбарт хөгжиж байна. Тухайлбал, Монголын байт сурын баг тамирчдыг Инчион хотод гурван долоо хоногийн турш бэлтгэл сургуулилт хийх нөхцөл бололцоогоор тус Инчон хотын дарга хангаж өгчээ.Мөн тус хотод ажиллаж, амьдарч байгаа Монголчуудад зориулан эмнэлэг, соёлын төв барьж ашиглалтад оруулсан аж. Уулзалтын үеэр Нийслэлийн Засаг дарга Ц.Батбаяр, БНСУ-ын Инчон хотын Иргэдийн хурлын дарга Ан Сон Сү нар хоер хотын ах дүугийн найрамдалт харилцаа тогтоох санамж бичигт гарын үсэг зурлаа. 

Япон улсын хамгийн хойд хэсэгт орших Хоккайдо мужийн төв Саппоро манай нийслэл хоттой дэлхийн Хотын дарга нарын холбоонд элссэн үеэс эхлэн холбоо тогтоож хамтын ажиллагааг хөгжүүлж эхэлсэн. Саппоро хот бол Олон Улсын Өвлийн Хотуудын Дарга нарын Холбоог санаачлагч хотуудын нэг төдийгүй хотын дарга нь тус холбооны Тэргүүн бөгөөд нарийн бичгийн дарга нарын газрыг өөрийн хотдоо ажиллуулдаг.

Улаанбаатар хот Саппоро хоттой мэргэжилтэн сургах чиглэлээр 2001 оноос эхлэн хөтөлбөр хэрэгжүүлж эхэлсэн бөгөөд 6 сарын хугацаатай аялал жуулчлал, хот тохижилт, хог хаягдлын менежментийн чиглэлээр өөрийн мэргэжилтнээ Саппоро хотод сургаад байна. Цаашид энэ ажлыг үргэржлүүлэн тухайн үеийн хэрэгцээт салбарын мэргэжилтнийг сургах төлөвлөгөөтэй байгаа. Мөн тус хотод жил болгон уламжлал болгон зохиогддог цасны фестивалиас санаа аван Улаанбаатар хотод Мөсөн хотхон байгуулах ажлыг жил бүрийн өвөл шинэ жилийг тохиолдуулан хийдэг болсон нь нийслэлийн иргэд хөдөлмөрчид, хүүхэд багачуудын хүсэн хүлээдэг ажлын нэг болсон.