Газартай холбоотой зөрчил маргаан ихэссээр байна
Barilga
2019-11-06
Төрийн өмчийн 3-р байранд Нийслэлийн газрын албаны санаачилгаар зохион байгуулсан уулзлалт ярилцлага боллоо. Энэхүү уулзалт нь “Кадастрын зурган мэдээллийн өөрчлөлт, шинэчлэлтийг Нийслэлийн мэдээллийн санд оруулахтай холбоотой үйл ажиллагааг боловсронгуй болгох нь” сэдэвтэйгээр 11-р сарын 9-ны өдөр явагдаж өнгөрлөө. Тэд энэхүү уулзлалтыг зохион байгуулах болсон шалтгаанаа хэлэхдээ: сүүлийн үед тусгай зөвшөөрөлтэй аж ахуй нэгж, байгууллагууд кадастрын зураглал хийхдээ БХБЯ-ны сайдын 2006 оны 91-дугаар тушаалын дагуу үйл ажиллагаагаа явуулаагүйгээс болж газрын зөрчил, маргаан ихэссэн гэж байлаа. Ихэнхдээ газар эзэмших, ашиглах, өмчлөх эрх үүсээгүй, зохих шийдвэргүй иргэн, аж ахуй нэгжид кадастрын зураглал хийдэг, нэг газар дээр давхардуулан зураглал хийдэг гэх мэт алдаа ихээр гардаг байна.
Энэ бүгдийг таслан зогсоох мөн БХБЯ-ны сайдын 91 дугаар тоот тушаалыг хэрэгжүүлэх зорилгоор энэ удаагийн уулзалт, ярилцлагыг зохион байгуулжээ. Энэхүү уулзлалт ярилцлаганд зохион байгуулагчидын зүгээс Нийслэлийн газрын албаны мэдээлэл технологийн газрын албаны дарга Ц. Ганбат, НГА-ны дэд дарга Э.Ариунгэрэл, НГА-ны газар зохион байгуулалтын хэлтсийн дарга Д.Баатаржав, НГА-ны газар өмчлөлийн хэлтсийн ахлах мэргэжилтэн Г.Уранбайгал болоод Нийслэл, дүүргийн газрын албууд, газрын харилцаа геодези зураг зүйн газар, кадастрын зураглал хийх тусгай зөвшөөрөл бүхий аж ахуй нэгж байгууллагууд оролцож санал бодлоо илэрхийллээ.
Д.Нарантуяа
БАРИЛГА.мн