Нийслэлийн Газрын алба өнөөдөр Сүхбаатарын талбайд нээлттэй өдөрлөгийг зохион байгуулна. Өдөрлөгийн үеэр нийслэлийн 370 жилийн ойн хүрээнд “Улаанбаатар хотын хөдөлгөөнт замналын систем”-ийг боловсруулан хэрэглээнд нэвтрүүлэх юм. Үүнийг төр захиргааны тусгай алба, төрийн байгууллага, ард иргэд өдөр тутмын үйл ажиллагаандаа хэрэглэж болохоос гадна хотын бүхий л хороолол, гэр хорооллын байршлын зураглал, хүссэн газраа хайж олох, яаж очих талаар дэлгэрэнгүй мэдээлэл авах боломжтой аж. Мөн нийслэлийн Газрын албанд иргэд оршин суугаа газрынхаа кадастрын зургийг харах хүсэлт гаргадаг байна.

 

Тиймээс Улаанбаатар хотын газрын зургийн зарим мэдээллүүдийг нээлттэй болгох үүднээс вэб технологийг ашиглан олон нийтэд хүргэхээр шийдсэн байна. Тэндээс иргэд өөрийн оршин сууж байгаа газрын байршил, хаяг, гудамж, засаг захиргааны хил зааг, хорооныхоо тухай мэдээллийг авах боломжтой болох юм.