Дамдинсүрэнгийн гудамжийг Олимпын замтай холбосон 1.4 км авто зам, 48.8 метр урттай гүүр ашиглалтад орлоо.

2006 оноос эхэлсэн дээрх зам тавих ажлыг “Хурдны зам” компани хийж гүйцэтгэжээ. Тус компани өнгөрсөн жил гүүрний зүүн хэсгийн 938 метр авто замыг хийж гүйцэтгэсэн бөгөөд 2009 онд гүүрний доод тал буюу туннелийн авто замтай нийлээд 470 метр урт авто зам, 48.8 метр урттай зам гүүрийг барьж дуусган ийнхүү ашиглалтад өгч байгаа ажээ. Ингэхдээ авто замын хэсгийг 268 сая төгрөгөөр, гүүрний хэсгийг нэг тэрбум 797 сая төгрөгийн өртгөөр барьж дуусгасан байна.

Нийслэлийн Засаг даргын Барилга, хот байгуулалт хариуцсан орлогч Б.Мөнхбаатар энэхүү замын нээлтийн ажиллагаанд оролцохдоо “Дамдинсүрэнгийн гудамжийг Олимпын гудамжтай холбосон энэ зам нээгдсэнээр Нийслэлийн төв замын ачаалал тодорхой хэмжээгээр буурах нь ойлгомжтой. Тиймээс энэхүү ажлыг хийж гүйцэтгэсэн болон зам тавих ажлыг ойлгож боломж олгосон айл өрх, иргэддээ баярлалаа гэж хэлье. Ингээд өнөөдрөөс эхлэн Нийслэлийн иргэд энэхүү замаар зорчих бүрэн боломжтой боллоо” гэж байв.

Дашрамд дурдахад өчигдөр мөн Баянзүрхийн гүүрний засварын ажлыг “Ган гүүр” компани хийж дуусган гүйцэтгэл дээр нь комисс ажиллажээ. Албан ёсоор ашиглалтад оруулах нээлтийн ажиллагаа энэ сарын 17-ны өдөр буюу ирэх амралтын өдөр болох юм байна.
 

Н.Уранзаяа