Нийслэл Улаанбаатар хотод түргэний, галын гээд яаралтай тусламж үйлчилгээ хүргэдэг газрын машинууд зарим тохиолдолд тойрч давхисаар цаг алдах явдал байдаг. Тэрчлэн иргэд байгаа газар, гудамжныхаа нэр хаягийг албан ёсоор хэлж мэддэгүйгээс болж олон төрлийн бэрхшээл ч учирдаг. Тэгвэл энэ байдал Улаанбаатарт ариллаа.

 

Нийслэлийн Газрын алба өчигдөр Сүхбаатарын талбайд нээлттэй өдөрлөг зохион байгуулж, энэ үеэрээ «Улаанбаатар хотын хөдөлгөөнт замналын систем», геопортал сайтыг боловсруулж хэрэглээнд нэвтрүүлснээ танилцуулсан юм.

 

«Улаанбаатар хотын хөдөлгөөнт замналын систем» http://map.cityland.mn геопортал сайт хэрэглээнд нэвтэрснээр албан байгууллага, иргэд гудамж талбай гээд хүссэн байршлаа хайж олох, тэнд хэрхэн хүрч очих талаар мэдээллээ авах бүрэн боломжтой болж байгаа ажээ. Нийслэлийн газрын албанаас дээрх өдөрлөгийн үеэр Нийслэлийн Онцгой байдлын газар, Яаралтай түргэн тусламжийн төв, Нийслэлийн замын цагдаа, Нийслэлийн цагдаагийн газар, Гэмтэл согог судлалын үндэсний төвд «Улаанбаатар хотын хөдөлгөөнт замналын систем»-ийг үнэ төлбөргүй ашиглах эрхийг олголоо. Ингэснээр онцгой үйлчилгээ үзүүлдэг эдгээр газар дуудлага аваад очих хороо, гудамж, байшингийнхаа нэр, дугаарыг олж, маршрутаа зохион цаг алдалгүй хамгийн богино хугацаанд очих боломжтой болж байгаа ажээ.

 

 

Гэхдээ энэ бол ганц л жишээ бөгөөд цаашдаа хэрэгцээнд зориулж янз бүрийн функцууд нэмэгдэх бөгөөд мэдээллийн санг тодорхой давтамжтайгаар байнга шинэчилж байх ажээ.

 

Өдөрлөгийн үеэр Нийслэлийн газрын албаны дарга Ц.Сандуйгаас зарим зүйлийг тодрууллаа.

 

-Улаанбаатар хот үүсч байгуулагдсаны 370 жилийн ой угтан Нийслэлийн газрын алба олон ажил хийлээ. Үүнээсээ гурван бүтээлч ажлаа иргэддээ танилцуулж хүртээл болгож байна. Хөдөлгөөнт замналын систем, геопортал мэдээллийн өндөр агууламжтай вэб сайтыг мэдээж иргэддээ зориулж хийсэн. Эхний ээлжинд хамтарч ажилладаг байгууллагууддаа хүргээд дараагийн ээлжинд худалдаанд гаргаж иргэддээ хүргэнэ. Мөн вэб сайт ашиглан хэрэглэж болно.

 

-Газар өмчлөх тухай хууль гарснаас хойш нийслэлийн айл өрхийн ихэнх нь газраа өмчилж авсан. Харин хуульд өөрчлөлт орж иргэн бүрт газар өмчлүүлдэг болсон. Үүнтэй холбоотой тооцож үзэх юм бол нийслэлийн иргэдийн 20-иод хувь нь газраа өмчилж аваад байна.

 

-Нийслэлд 13 байршилд газар олголт, газар өмчлөл явагдаж байна. Тухайлбал Сонгинохайрхан дүүрэгт 3-69-ын гарам, Хан-Уул дүүргийн 12 дугаар хороо, Багануур, Багахангай, Налайх дүүргүүдэд газар өмчлүүлж байгаа.

 

-Зуслангийн газрын өмчлүүлэх бэлтгэл ажил бүрэн хангагдсан. Одоо харин энэ төлөвлөгөөг НИТХ-аар батлуулахаар хүлээж байна.

 

-Энэ нь хоёр гурван талтай. Иргэдийн энэ талаарх ойлголт сайнгүй байна. Банк санхүүгийн систем дээр хууль эрх зүйн орчинд өөрчлөлт оруулах шаардлагатай байгаа гэж бодож байна. Тухайлбал: газраа байшингаар солих, барьцаалах гэх мэт асуудалд. Бас банкууд иргэдийн хүссэн үнэд хүртэл газрыг үнэлж, барьцаалахгүй байгаагаас болж байх шиг байна.

 

-Кадастрын зураглал хийх тусгай зөвшөөрлийг ЗТБХБЯ өгдөг. Харин манайх тэдний хийсэн зургийг шалгаж, мэдээллийн сандаа оруулж байгаа.

Мөн энэ өдөрлөгийн үеэр Мөрөөдлийн цэцэрлэгт хүрээлэнг Баянгол дүүргийн нутаг байгуулж эхэлсэн тухайгаа танилцуулж, газартай холбоотой маргааныг хэрхэн шийдвэрлүүлэх, газар өмчлөхийн тулд ямар бичиг баримт бүрдүүлэх гээд тус байгууллагатай холбоотой бүхий л мэдээллийг иргэдэд өгч, газар төлөвлөлтийн зарим асуудлаар иргэдийн дунд санал асуулга явууллаа.