Монгол Улсад шинэ цагийн барилгын салбар үүсч хөгжсөний 91 жилийн түүхт ойн баяр дээр салбарын түүчээ болсон хэвлэл мэдээллийн байгууллагыг үүсгэн байгуулсан “Барилга Эм Эн” ХХК-ийн 10 жилийн ой давхар тохиож байна. Та бүхэндээ баярын мэнд хүргэе.

  Ойн баяруудыг тохиолдуулан манай хамт олны зүгээс “БАРИЛГА.МН” сэтгүүл, BARILGA.MN вэбээр дамжуулан барилгын салбарынхаа мэдээ мэдээллийг түгээхийн зэрэгцээ бүтээн байгуулагчид, үйлдвэрлэгчид, ханган нийлүүлэгчдийнхээ үйл ажиллагааг танилцуулдаг “БАРИЛГА, ОРОН СУУЦ 2017” үзэсгэлэн яармагаа амжилттай зохион байгууллаа.
           
  Барилгын салбар үүсэл хөгжлийнхөө түүхт 91 жилийн ойгоо тэмдэглэн өнгөрүүлэх цаг мөчид манай хамт олон та бүхэнтэй цаашдын ажил бүтээлийн их замын гараан дээр хамтдаа байгаадаа бэлэгшээж байна.

  Хоёр зуун дамжсан нэн бахархалтай бүтээн байгуулагч түүхтэй Монгол Улсын барилгын салбарын туулсан замнал, хийж бүтээсэн бүхэн улс орныхоо ирээдүйн хөгжил дэвшлийн төлөө хийх гэж буй хэтийн төлөвлөгөө, том зорилтын маань үндэс суурь, нөөц боломж болж байгаа билээ.

  Бид өчигдөргүйгээр өнөөдрийг бүтээж, өнөөдрийн бүтээлдээ амжилт ололгүйгээр маргаашаа төлөвлөж чадахгүй. Иймд ахмад үеийн нийт ажилтан, албан хаагчид, Барилга, нийтийн аж ахуй, Газар Зохион Байгуулалт, геодези зураг зүй, барилгын салбарт хамаарагдах олон зуун аж ахуйн нэгж, байгууллага, үйлдвэр эрхлэгчид, салбар бүрийн яам, агентлагууд, Нийслэлийн удирдлагууд, МСҮТ-үүд та бүхэнд хандаж нээлттэй хамтран ажиллахыг уриалан мэндчилж байна.
           
  Барилгачид аа, Та бүхэндээ эрүүл энх, баяр баясгаланг ерөөж, бүтээн байгуулалтын ажил үйлсэд тань улам их амжилт хүсье.