Манай орны барилгын салбарынхан, тэр дундаа ахмад, дунд үеийнхний сайн мэдэх нэгэн эрхэм “Барилга.МН” сэтгүүлийн эрхлэгчээр томилогдон ажилдаа орлоо.

  Алтангэрэлийн Мягмаржав нь Завхан аймгийн Идэр сумын уугуул, Барилгын инженер, Сэтгүүлч мэргэжилтэй, Монгол улсын зөвлөх инженер хүн. Тэрбээр тухайн үеийн Сайд нарын Зөвлөлийн Барилга-архитектурын комисс болон Улсын мэргэжлийн хяналтын газар, Нийслэлийн мэргэжлийн хяналтын газарт барилгын техникийн хяналтын улсын байцаагч, улсын ахлах байцаагч, Улсын барилгын хороо, Барилгын яамны хэвлэл “Барилгачин” сэтгүүлийн хариуцлагатай нарийн бичгийн дарга, ”Монгол өргөө” сонин, “Барилгын мэдээлэл” сэтгүүл, Барилгачдын хэвлэлийн нэгдсэн редакцын эрхлэгч, төрийн төв хэвлэл-“Ардын эрх” сонины сурвалжлагч, тоймч, өдөр тутмын анхны чөлөөт хэвлэл “Өнөөдөр” сонины албаны дарга, орлогч эрхлэгч, Монголын үндэсний радиогийн мэдээллийн “Хурд агентлагийн  захирал зэрэг ажлыг эрхэлж явсан.

  Монголын анхны мэргэжлийн холбооны нэгэн болох Монголын барилгачдын холбоог үүсгэн байгуулагчдын нэг. Барилгын салбар, мэргэжил, нутаг ус, яруу найргийн төрлөөр арав гаруй ном хэвлүүлж, мэргэжлийн болон уран зохиолын олон ном хянан тохиолдуулсан, хамтран зохиогчоор ажилласан. Шотландын яруу найрагч Роберт Бёрнс, японы яруу найрагч Исикава Такубоку нарын шүлгийн түүврийг эх хэлнээ орчуулж хэвлүүлсэн байна.

  Сонин болон радиогийн шилдэг бичлэгийн хоёр удаагийн оны шагнал хүртсэн, ЮНЕСКО-гийн үндэсний комиссын шагналтай, “Хэвлэлийн эрх чөлөөний одон”,  “Ган үзэгтэн” шагналт  сэтгүүлч. “Тэргүүний  барилгачин”, “Монгол улсын соёлын тэргүүний ажилтан”, “Мэргэжлийн хяналтын тэргүүний ажилтан”, “Хэвлэл мэдээллийн тэргүүний ажилтан”, “Радио, телевизийн тэргүүний ажилтан” цол, тэмдэг, “Алтан гадас” одон, Хөдөлмөрийн гавьяаны улаан тугийн одонгоор шагнагдсан. МСНЭ-ийн болон МЗЭ-ийн шагналт зохиолч, сэтгүүлч юм.

  “Барилга.МН” сэтгүүлийн хамт олон ийнхүү барилгын инженер, сэтгүүлч, зохиолч  эрхлэгчтэй болсондоо урамтай байна.