Улс, барилгын байгууллагад олон жил идэвхи үр бүтээлтэй ажиллаж ажлын өндөр амжилт гарган залуу үеийнхэндээ үлгэр дууриалал болж, барилгын материалын 4 үйлдвэрийг шинээр ашиглалтанд оруулж, барилгын салбар болон барилгын салбарын мэргэжилтэй боловсон хүчин бэлтгэхэд оруулсан хувь нэмрийг нь өндрөөр үнэлэн 2009 оны 10-р сарын 19-ны өдөр Монгол Улсын Ерөнхийлөгчийн зарлигаар Аж үйлдвэрийн гавъяат ажилтан цол, тэмдэгээр Ган хийц ХК-ийн ТУЗ-ын дарга, Ерөнхий захирал Маньдир овогтой Даваасүрэнг шагналаа.

 

Маньдирын Даваасүрэн нь 1958 онд Улаанбаатар хотод төрж, Нийслэлийн 10 жилийн 6-р дунд сургуулийг 1967-1977 онд, ЗХУ /хуучин нэрээр/ -ын Свердловскийн Уралын Политехникийн дээд сургуулийг 1977-1983 онд барилгын инженерийн мэргэжлээр төгсөж 1996 онд Дэд бүтцийн ажилтаны мэргэжил дээшлүүлэх институт дүүргэн Монгол улсын “Зөвлөх инженер” цол хүртэн улмаар 2001 онд түүнийгээ баталгаажуулсан байна.

М.Даваасүрэн ажил хөдөлмөрийн гараагаа Барилга, барилгын материалын үйлдвэрийн яамны харъяа Цахилгаан сантехникийн нэгдсэн үйлдвэрт инженерээр эхлэн, 1983-1985 онд уг үйлдвэрт инженер, 1985-1994 онд Барилгын төмөр хийцийн үйлдвэрт инженер, чанарын удирдлагын инженер, ерөнхий инженер, 1994 оны 11-р сараас  Үйлдвэрлэл худалдааны “Ган хийц” ХК-ийн гүйцэтгэх захирал, 1998 оноос тус компанийн ТУЗ-ийн дарга бөгөөд ерөнхий захиралаар ажиллан компанийн үйлдвэрлэлийн үндсэн үйл ажиллагааг удирдан ажиллаж байна.

 

М.Даваасүрэн нь 1998 онд Монголын зах зээлд төрөл бүрийн шуудай үйлдвэрлэн нийлүүлэх зорилгоор компанийн дэргэд “Ган Ён Пластик” ХХКомпанийг, 1999 онд барилга угсралт, засварын ажил гүйцэтгэх чиглэлээр “Ган-Эрдэнэ Констракшн”, 2005 оноос эхлэн “Сэндвич хавтан”-гийн үйлдвэрийг байгуулж, зам тээвэр, уул уурхай, барилгын салбаруудад өргөнөөр ашиглах бүх боломжийг нээж өгсөн байна. Мөн 2006 оноос төмөр бетон тулгуур үйлдвэрлэх “Хүчитгэсэн бетон хийц” ХХК-ийг байгуулан эрчим хүчний салбарт өргөнөөр ашиглагдах бетон тулгуур баганыг үйлдвэрлэх болсноор байгаль орчинд хор нөлөөгүй хаягдалгүй технологийг үйлдвэрлэлд нэвтрүүлсэн зэрэгт нь энэхүү хүндтэй шагналыг хүртээжээ.

Монгол улсын аж үйлдвэрийн гавъяат ажилтан цолыг хүртсэн “Ган хийц” ХК-ийн захирал М.Даваасүрэн болон “Ган хийц” ХК-ийн хамт олонд ажил хөдөлмөрийн өндөр амжилт хүсэж, Монгол улсын хөгжил цэцэглэлтэд улам их хувь нэмэр оруулахыг хүсэн ерөөе.