Барилгын ажил нь зураг төслөөсөө эхэлдэг. Тийм ч учраас Монгол улсад барилгын зураг төсөл, хайгуулын байгууллага үүсэж хөгжөөд 78-н жилийн нүүрийг үзэж байна. Нийгмийн шинэ тогтолцоо, зах зээлийн харилцаанд шилжсэн 1990-ээд оноос зураг төслийн төвлөрсөн, төрөлжсөн байгуулгууд задарч, хувийн хэвшлийн жижиг аж ахуй нэгжүүд байгуулагдсан. Өнгөрсөн хугацаанд зураг төслийн байгууллага, зураг төсөлчидийн үйл ажиллагаа, бүтэц зохион байгуулалт, материаллаг бааз, хүний нөөц, техник технологи, мэдээллийн хүртээмж зэрэг асуудлууд, төр, засгийн бодлого, шийдвэрт төдийлөн дорвитой байдлаар тусгагдаж бодитой дэмжлэг болж хэрэгжээгүй бөгөөд энэ салбарын ажил нь ерөнхийдөө удааширалтай явагдаж иржээ. Иймд зураг төслийн мэргэжлийн байгууллагууд, инженер, техникийн ажилтнууд өөрсдийн санаачлага, идэвхи оролцоотойгоор зураг төслийн салбарын үйл ажиллагааг шинэ шатанд гаргах шаардлага зорилттойгоор Барилгын Зураг Төсөл Зохиогчидийн Холбоог байгуулжээ.

“Автор”, “Балдан С”, “БТ”, “Зуун найм”, “Инж геотех”, “Конконсалтинг”, “Марс констрагшн”, “Монар”, “Өргөө дизайн”, “Өрх”, “Таван үндэс”, “Ти-энд-жи”, “Ухат”,”Эрчим төсөл”, зэрэг компаниудын санаачилгаар байгуулагдсан энэхүү холбоо нь 2007 оны 6-р сарын 7-ны өдөр албан ёсоор байгуулагджээ. Одоогоор БЗТЗХ-нд 40 гаруй байгууллага гишүүнээр элсээд байгаа юм байна.

БЗТЗХ нь барилга, хот байгуулалт, зураг хайгуулын салбарт төрөөс баримтлах бодлогыг дэмжих замаар зураг, хайгуулын ажлыг боловсронгуй болгон олон улсын жишигт хүргэх, гишүүн байгууллага, гишүүдийн эрх ашгийг хамгаалах тэднийг бүх талаар нь хөгжүүлэх бөгөөд энэхүү зорилгоо хэрэгжүүлэхийн тулд дүрмэндээ заасан олон чухал ажлуудыг хийж гүйцэтгэхээр төлөвлөж байгаа юм байна. БЗТЗХ-ний эхний хийсэн томоохон ажил бол зураг төслийн зөвшөөрөлийн асуудал юм. Зураг төслийн зөвшөөрөл авахад 26-н хүний гарын үсэг хэрэгтэй байдаг байна. Зөвшөөрөл авахын тулд олон шат дамждаг мөн хугацаа их алддаг учраас энэ бүгдийг багасгах тал дээр анхаарч ажилжээ. Үйл ажиллагаагаа эхлүүлээд удаагүй байгаа энэ хамт олон цаашдаа олон дорвитой алхамуудыг хийхээ хэлж байлаа.