Төлбөр тооцоог үндэсний мөнгөн тэмдэгтээр гүйцэтгэх тухай хууль УИХ-аар батлагдан, хэрэгжиж эхэлсэнтэй холбогдуулан Санхүүгийн зохицуулах хорооноос мэдэгдэл гаргалаа.

 

Монгол Улсын нутаг дэвсгэр дээр үйл ажиллагаа явуулж буй банкнаас бусад хуулийн этгээд, иргэдийн бараа, ажил, үйлчилгээний үнийн төлбөр тооцоонд тавих хяналт Санхүүгийн зохицуулах хорооны зохицуулалтын хүрээнд хамаарагдахаар заасан байна. Энэ дагуу шалгалт хийх, хууль зөрчигдвөл холбогдох арга хэмжээг авах, шаардлага тавихаа мэдэгджээ. Мөн энэ хуультай холбоотой мэдээллийг 26-64-20 дугаарын утсаар ажлын цагаар тогтмол авч, мэдээллийн дагуу хяналт шалгалт хийх аж. Хууль зөрчсөн хуулийн этгээд, иргэдэд зөрчлийг арилгуулах шаардлага тавьж, зөрчлийг арилгаагүй бол иргэнийг хөдөлмөрийн хөлсний доод хэмжээг 10-30 дахин, хуулийн этгээдийг 50-100 дахин нэмэгдүүлсэнтэй тэнцэх хэмжээний төгрөгөөр торгох, үйл ажиллагаа эрхлэх эрхийг хүчингүй болгуулах арга хэмжээ авах юм.

 

Аж ахуйн нэгж, байгууллага, иргэдийн бодит орлого болон худалдан авах чадварыг тогтворжуулах, дотоодын зах зээл дэх гадаад валютын зохиомол эрэлтийг багасгах, гадаад валютын ханшийн хэлбэлзлийн инфляцийн өсөлтөд нөлөөлөх хүчин зүйлийг саармагжуулах замаар улс орны макро эдийн засгийн тогтвортой болон аюулгүй байдалд сөргөөр нөлөөлөх хүчин зүйлсийг хязгаарлах зорилгоор Монгол Улсын нутаг дэвсгэр дээр бараа, ажил, үйлчилгээний үнийг зөвхөн үндэсний мөнгөн тэмдэгт төгрөгөөр илэрхийлж, төлбөр тооцоог төгрөгөөр гүйцэтгэх тухай хууль гаргасан юм.