3.1 тэрбум төгрөгийн тохижилтын ажил хийлээ
Barilga
2019-11-05
Нийслэлийн 370 жилийн ой сарын дараа болно. Энэ ойг угтаж нийслэлээ тохижуулах талаар ямар ажил амжуулсныг нь нийслэлийн Захирагчийн ажлын албаны Хот нийтийн аж ахуйн хэлтсийн ахлах мэргэжилтэн Л.Баатарцогтоос тодрууллаа.
-Нийслэлийн 370 жилийн ой угтаж хот тохижилтын чиглэлээр ямар ажил хийж байна вэ? Ер нь энэ онд хэр хэмжээний хөрөнгөөр тохижилт хийхээр төлөвлөсөн юм бэ?
-Нийслэлийн 370 жилийн ойг угтан хот, дүүргээс Улаанбаатар хотыг тохижуулах өнгө үзэмжийг нь сайжруулах чиглэлээр нэлээд ажил хийхээр төлөвлөн ажиллаж байна. Энэ онд хотын хэмжээгээр 5.4 тэрбум төгрөгийн тохижилтын ажил хийхээр төлөвлөсөн. Оны эхний найман сарын байдлаар 3.1 тэрбум төгрөгийн ажил хийлээ. Энэ зарцуулсан нийт хөрөнгийн 45 хувийг нийслэлийн төсвөөс, 18 хувийг дүүргүүдийн төсвөөс, 34 хувийг нь байгууллага аж ахуйн нэгжүүдийн хөрөнгөөр үлдсэнийг нь бусад сан, хандивын хөрөнгөөр хийгээд байна.
-Тодорхой жишээ хэлээч? Ямар хэмжээний газрыг тохижуулаад байна вэ?
-169.0 мянган ам.метр талбайг цэцэрлэгжүүлж, 53 тоглоомын талбайг шинээр болон засч тохижуулсан,11.9 метр урт гэрэлтүүлэг шинээр тавилаа. Хотын хөрөнгөөр Зөвлөлтийн дайчдын хөшөө, цогцолбор, жанжин Сүхбаатарын хөшөө, Энхтайваны хонх цогцолборыг засч шинэчиллээ.Мод зүлгийн усалгаа сайжруулах зорилгоор 6.5 км урт услалтын системийг төвийн гол гудамжуудаар байгуулж ашиглалтад оруулсан. Гэр хорооллын амьдрах орчныг сайжруулах үүднээс Самбалхүндэвийн оршуулгын газрыг тусгаарлах хашаа бариад байна. Эдгээр ажлуудыг хотын хөрөнгөөр хийсэн.
-Дүүргүүдийн болон бусад хөрөнгө оруулалтаар ямар ажил амжуулав?
-Сонгинохайрхан дүүрэг гэхэд Энхтайваны өргөн чөлөөний Таван шараас Саппоро төв хүртэлх хэсгийн ногоон байгууламжийг, Баянгол дүүрэг Саппорогоос 25 дугаар эмийн сан хүртэлх хэсгийн гудамжийг иж бүрэн тохижуулаад байна. Чингэлтэй дүүрэг Самбуугийн болон Бага тойруугийн гудамжийг, Баянзүрх дүүрэг зүүн дөрвөн замаас Эскадрилийн хөшөө хүртэлх гудамжийг иж бүрэн тохижууллаа.
Төмөр замын дээд сургуулийн өмнөх талбайд улсын хөрөнгө оруулалтаар томоохон хэмжээний усан оргилуур байгуулсан. Сүхбаатар дүүрэг Туркийн хөрөнгө оруулалтаар Улаанбаатар зочид буудлын өмнөх цэцэрлэгийг өөрчлөн шинэчлэх ажлыг хийж байна.
- Туул голын эрэг дагуу байгуулах Үндэсний цэцэрлэгт хүрээлэнгийн хувьд энэ жил ямар хэмжээнд хүргээд байна вэ?
-Үндэсний цэцэрлэгт хүрээлэнгийн шавыг тавьж, 55 га талбайд мод сөөг тарихаар төлөвлөсөн. Энэ ажилд нийслэлийн хөрөнгө оруулалтаас нэг тэрбум төгрөг зарцуулж, нийт 120 мянга гаруй мод сөөгийг мэргэжлийн байгууллагууд тариад байна. Цаашдаа жил бүр тодорхой зураг төсвийн дагуу ажлуудыг хийх болно.
Монцамэ