Баянзүрх дүүргийн 20 дугаар хорооны нутаг дэвсгэрт байрлах Гачуурт тосгонд ундны усны шинэ эх үүсвэрийг барьж байгуулахаар болжээ. Ингэснээр Улаанбаатар хотын хүн амын цэвэр усны хангамжийг эрс нэмэгдүүлэх боломжтой юм. Ундны усны шинэ эх үүсвэрийг байгуулахдаа 30-40 метр гүн, хоорондоо 250 метр зайтай ус татах 21 худгаар дамжуулан, хоногт 25 мянган шоо метр ус олборлохоор төлөвлөж байгаа юм. Мөн 8000 шоо метрийн багтаамжтай усан сан болон ус цуглуулах, дамжуулах хоолойтой байх юм.

 

Гачууртад гүний усны нөөц хангалттайгаас гадна ус нь сайн чанартайг харгалзан ундны усны шинэ эх үүсвэрийг энд байгуулах болжээ.

 

Нийслэлийн хүн ам өсөн нэмэгдэхийн хэрээр усны хэрэглээ нэмэгдэж байгаа билээ. Засгийн газраас хийсэн судалгаагаар өдөрт хэрэглэх усны хэмжээ 2020 он гэхэд одоогийнхоос хоёр дахин өсөх тооцоо гарсан байна. Одоо ашиглаж байгаа худгууд нь бүх хүчин чадлаараа ажиллахад өдөрт 300 мянга гаруй шоо метр усаар хангах боломжтой бөгөөд цэвэр усны хэрэглээ энэ хүчин чадлаас давж, улирлын чанартай усны хомсдол үүсч эхлээд байгаа юм.

 

 

Монцамэ