Сонгогчдын эрх ашгийг хамгаалах “Урагш дэвших” Төрийн бус байгууллагаас өмч хувьчлалд хамрагдаагүй иргэдийн эрх ашиг зөрчигдөж байгаа талаар өчигдөр мэдээлэл хийлээ.

 

Тус холбооны гүйцэтгэх захирал Д.Үржинбадам хэлэхдээ “1991 оноос өмч хувьчлал явагдаж эхэлсэн. Гэвч одоо хүртэл энэхүү өмч хувьчлалд хамрагдаагүй олон хүн байгаагийн ихэнх нь багш, эмч, инженер, цэрэг армийнхан болон өрх толгойлсон эмэгтэйчүүд, эмзэг бүлгийнхэн байдаг. Үүн дотор улсын байгууллагад 20-55 жил ажилласан өндөр настангууд бий. Энэ нь өмч хувьчлал ил тод, шударга явагдаагүйг харуулж байгаа бөгөөд одоо 8000 гаруй иргэн хувьчлалд хамрагдаж чадаагүй хэвээр байна. Үүнээс болж тэд өөрийн гэсэн орон байргүй, хашаа байшинд зарим нь айлын хажуу өрөөнд ядуу зүдүү амьдарч байгаа юм. Ингэснээр зарим иргэдийн Үндсэн хуулинд заагдсан “Шударгаар өмч хөрөнгө олж авах” эрх зөрчигдөж байна гэж үзэж байна” хэмээлээ. Энэ холбооноос Засгийн газарт шаардлага хүргүүлж ирэх сарын 25-ны дотор хариу өгөхийг шаардаж, хэрвээ нааштай арга хэмжээ авч өгөхгүй бол ямар ч хэлбэрээр тэмцэнэ гэдгээ илэрхийллээ.

 

Улаанбаатар таймс