Улаанбаатар хотын нутаг дэвсгэрт эзэмшил, ашиглалтад олгохгүй болон барилга, байгууламж барихыг хориглох газрын байршил, хэмжээг заасан НИТХ-ын тогтоол гарчээ. Тогтоолд долоон дүүргийн 54 байршилд газар олгож, барилга, байгууламж барихыг хориглосон аж.

 

Энэ нь газар зохион байгуулалтын төлөвлөгөөнд тусгагдсаны дагуу нийтийн эзэмшлийн ногоон байгууламж, зам талбай, ундны усны эх үүсвэрийг хамгаалах зорилготой. Тухайлбал, ТЭЦ-IV-ийн урд Туул голын дагуу "Мөрөөдлийн цэцэрлэгт хүрээлэн", УИД-ээс Сөүлийн гудамж хүртэлх хичээнгүй сайд Цэрэндоржийн гудамж дагуух цэцэрлэгт хүрээлэн бүхий талбай, Жуковийн музейн баруун талаар хойш үргэлжлэх цэцэрлэгт хүрээлэнд эзэмшил, ашиглалтад олгох болон барилга байгууламж барихыг хориглосон байна.

 

Мөн Сансарын тунелийн баруун талын хэсгийн хойт болон урд талбай, Богд хаанымузейн зүүн талын цэцэрлэгт талбай, Буянт-Ухаагийн ерөнхий төлөвлөгөөний зам дагуух хамгаалалтын зурвас зэрэг нийтийн эзэмшлийн талбай, ногоон байгууламж хориглосон байршилд орсон байна.