Юуны түрүүнд Танд Улсын Их Хурлын 100 хувийн дэмжлэгэтэйгээр Монгол Улсын 30 дахь Ерөнхий сайдын албан тушаалд томилогдсон явдалд барилгын салбарын мэргэжлийн холбоод халуун баяр хүргэж, цаашдын ажил үйлсэд нь амжилт хүсэж байгааг хүлээн авна уу.

  Монгол Улсын Барилга, хот байгуулалтын сайдын эрхлэх асуудлын хүрээнд багтдаг Хот байгуулалт, газар зохион байгуулалт, барилга, орон сууц, нийтийн аж ахуй, геодези зураг зүйн салбарт манай нийт хүн амын 17-18 хувь нь ажилладагаас гадна араасаа олон зуун үйлдвэрлэл, үйлчилгээний бизнесийг дагуулдаг билээ. Монгол Улсад тулгараад буй одоогийн эдийн засгийн хямрал нь бүтээн байгуулалтыг хэрэгжүүлэгч Барилгын салбарт маш хүндээр тусаад байна.

  Жил гаруй хугацаанд Г.Мөнхбаяр сайдаар удирдуулсан Барилга, хот байгуулалтын яам нь мэргэжлийн байж, салбарын мэргэжилтнүүд, эрдэмтэд, мэргэжлийн холбоодтой нягт хамтран ажиллаж, Нийслэл хот, Барилга, хот байгуулалтын яамны бодлого, үйл ажиллагаа нэгдмэл нээлттэй, салбарын нийт хамт олны дэмжлэгийг авч идэвхи, урам зоригтойгоор ажилласан.

  Иймд шинээр томилогдсон Ерөнхий сайд Таныг Засгийн газраа шинээр байгуулах болсон энэ чухал үед Барилгын салбарын мэргэжлийн холбоод, Төрийн бус байгууллагууд нэгдэн дараах мэдэгдлийг сонордуулж байна.

  Барилга, хот байгуулалтын асуудал эрхэлсэн Засгийн газрын гишүүн нь мэргэжлийн байх, салбарын мэргэжлийн холбоод, мэргэжилтнүүд, эрдэмтэдтэй нягт хамтран ажиллах,  бусад Сайд болон Нийслэл хот, орон нутгийн удирдлагатай  бодлого, үйл ажиллагаагаа уялдуулах, салбарын нийт хамт олны дэмжлэгийг авч ажиллах шаардлагатай гэж үзэж байна.

  Барилгын салбарын төрийн захиргааны төв байгууллага нь дунд болон урт хугацааны бодлогыг боловсруулан түүнийгээ хэрэгжүүлэх чадвартай, салбарынхаа онцлог, тулгамдаж буй асуудлыг ойлгож мэддэг, түүнээс гарах арга замыг олж чаддаг, салбартаа хүлээн зөвшөөрөгдсөн, төрийн ажлын туршлагатай сайдаар удирдуулсан мэргэшсэн мэргэжлийн баг байх ёстой бөгөөд төр-хувийн хэвшлийн хамтын ажиллагааг дэмждэг, нээлттэй байх Сайдтай бид хамтран ажиллахыг хүсэж байна.

  Давхар дээлтэй, ашиг сонирхлын зөрчилтэй, салбарын болон төрийн ажлын туршлагагүй хүнийг Барилга, хот байгуулалтын асуудал эрхэлсэн Засгийн газрын гишүүнээр нэр дэвшүүлэн томилуулахыг бид нэгдмэл байр суурьтайгаар дэмжихгүй гэдгээ үүгээр уламжилж байна.

  Та бидний хүсэлтийг хүлээн авч, мэргэжлийн хүнийг нэр дэвшүүлнэ гэдэгт бид итгэлтэй байна.

  Манай хамт олны дэмжлэгийг хүлээсэн Сайдтай Засгийн газрын үйл ажиллагааны хөтөлбөрийг хэрэгжүүлэхийн төлөө хамтран ажиллах болно.