Өмнөд Америк тивд анх удаа олимп зохиогдохоор боллоо
Barilga
2019-11-05
Олон улсын олимпийн хороо/ОУОХ/-ны ээлжит хурлаар 2016 оны зуны олимпийн наадам зохион байгуулах эрхийг Бразилийн Рио де Жанейро хотод олгожээ.
ОУОХ-ны 90 гаруй гишүүн орны төлөөлөгч оролцсон гурван тойргийн санал хураалтын дараа ОУОХ-ны Ерөнхийлөгч Жак Рогге олимпийн наадам зохион байгуулах эрхийг Рио де Жанейро хот авсныг зарласан байна. Бразилийн энэ хот нэр хүндтэй эрхийг авахын төлөө АНУ-ын Чикаго, Японы Токио, Испанийн Мадрид хоттой өрсөлдсөн юм. Чикаго хот хангалттай санал авч чадаагүй учир санал хураалтын эхний тойргоос хасагджээ. Тус хот Рио де Жанейро хотын гол өрсөлдөгч гэж хэвлэлүүд таамаглаж байсан ч эхний тойргийн санал хураалтаар хасагдсан билээ. Харин Японы Токио хот хоёрдугаар тойргийн санал хураалтаар өрсөлдөөнөөс гарсан байна.
Эхний тойргийн санал хураалтаар Мадрид 28 санал, Рио 26, Токио 20, Чикаго 18 санал тус тус авчээ. Хоёр дахь санал хураалтаар Рио 46 санал, Мадрид 24, Токио 20 санал авсан байна. Харин сүүлчийн санал хураалтаар Рио 66 санал, Мадрид 32 санал тус тус цуглуулж, өрсөлдөөний ялагч тодорчээ. Эдийн засаг болон газар зүйн байдлаа илтгэлдээ тусгасан нь олимпийн наадам зохион байгуулах эрх авахад ихээхэн нөлөөлсөн гэж Рио хотын төлөөлөгч үзэж байгаа юм.
«Манай улс эдийн засгийн гайхалтай үеийг туулж байгаа» гэж Бразилийн Ерөнхийлөгч Лиуз Инасио Лула даСильва ОУОХ-ны гишүүдэд ханданд хэлсэн илтгэлдээ дурджээ. «Биднийг дэмжихийг та бүхэнд уриалж байна. Бидэнд боломж олговол та бүхэн харамсахгүй. Бразилчууд эрч хүчтэй, бүтээлч хүмүүс. Бразил болон Өмнөд Америкийн орнууд урьд нь хэзээ ч олимпийн наадам зохион байгуулж байгаагүй. Одоо бразилчуудын цаг болсон гэдэгт би итгэлтэй байна. Өмнөд Америкийн орнууд олимпийн наадам зохион байгуулах эрхийн төлөө өрсөлдөж байна. Бүс нутагтаа хэзээ ч зохион байгуулж байгаагүй олимпийн эрхийг авах нь бидний цорын ганц зорилго: Бусад орны хувьд олимпийн наадам нь өөр нэг олимп л болно. Харин бидний хувьд энэ нь юутай ч зүйрлэшгүй боломж» гэж Бразилийн төрийн тэргүүн Сильва хэлсэн байна. «Олимпийн наадам зохион байгуулах эрх нь зөвхөн Бразил улсын биш, Өмнөд Америкийн ч эрх биш. Энэ бол 400 сая эрэгтэй, эмэгтэй болон 180 сая хүүхэд залуустай тивийн эрх болно» гэдгийг тэрбээр тэмдэглэн хэлжээ.
Рио хот олимпийн наадам зохион байгуулах эрх авахын тулд олон ажиллагаа явуулж, улсынхаа алдартнууд болох хөл бөмбөгийн домогт тоглогч Пеле, Олон улсын хөл бөмбөгийн холбооны хүндэт Ерөнхийлөгч Жоао Хавеланже нарыг сурталчилгаандаа хамруулжээ. Хавеланже ОУОХ-ны гишүүдэд хандан Рио хотыг дэмжихийг уриалан 2016 онд Рио хотноо 100 насны ойн баярыг нь хамт тэмдэглэхийг урьсан байна
Монцамэ