Дэлхийд тэргүүлэгч хөрөнгө оруулалтын “Нью Йорк Меллон банк” болон Лондонгийн хөрөнгийн бирж санаачлан Худалдаа, хөгжлийн банк, Голомт Банк, Хаан Банк, Тэнгри Секуритиес БДК-тай хамтран “Хөрөнгө Босгох Шинэ Боломжууд” сэдэвт олон улсын семинарыг 2009 оны 10 дугаар сарын 14-ний өдөр “Кемпински” зочид буудлын Хурлын танхимд зохион байгуулах гэж байна.

 

Уг семинар нь Монголын компаниудад дотоод, гадаадын хөрөнгийн зах зээл дээр хэрхэн хөрөнгө босгож санхүүжилт олж авах болон хувьцаа гаргах талаар өргөн цар хүрээтэй мэдээлэл өгөх зорилготой бөгөөд сүүлийн жилүүдэд ихээр яригдах болсон компанийн засаглалын асуудал ч мөн хөндөгдөх юм.

Уул уурхай, аялал жуулчлал, дэд бүтэц зэрэг томоохон хөрөнгө оруулалт шаардагдаж буй төсөл хөтөлбөрүүдийг амжилттай хэрэгжүүлэхэд зайлшгүй шаардагдах хөрөнгө оруулалт, санхүүгийн эх үүсвэрийг дотоодын болоод дэлхийн хөрөнгийн зах зээл дээрээс босгоход голлон анхаарах асуудлуудын талаар энэхүү семинарт хүрэлцэн ирсэнээр илүү дэлгэрэнгүй мэдээлэл авах боломжтой юм.

 

Дашрамд дурьдахад 225 жилийн түүхтэй Нью-Йоркийн хамгийн анхны банк болох дэлхийд тэргүүлэгч Нью-Йорк Меллон банк болон дэлхийн 400 орчим хөрөнгө оруулалтын сан, брокер диллерийн компаниудыг эгнээндээ нэгтгэсэн Лондонгийн хөрөнгийн биржийн шилдэг мэргэжилтнүүд ийнхүү өөрсдийн туршлага, шинэ боломжуудаасаа Монголчуудтай хуваалцах гэж байгаа нь олон хүний анхаарлыг зүй ёсоор татаж байна.

Тун удахгүй болох энэхүү олон улсын семинар үнэ төлбөргүй явагдах бөгөөд хөрөнгө босгох шинэ боломжууд эрхэм таны өмнө нээлттэй байна.

 

Семинарт оролцох бүртгэлийг info@tengrisecurities.com дээр хийж байгаа тул оролцох хүсэлтэй компаниуд хүсэлтээ ирүүлнэ үү. Дэлгэрэнгүй мэдээллийг 70130695, 88116290 дугаарын утсаар холбогдож тодруулах боломжтой.