Хойд Солонгосын хий үзэгдлийн хэмээгддэг зочид буудал эргэн амь орж эхэлжээ. Esquire сэтгүүл нэгэнтээ “хүн төрөлхтний түүхэн дэхь хамгийн муу барилга” хэмээн цоллож байсан 105 давхар Рюгеон /Ryugyong / зочид буудлын барилга дэлхийн хамгийн түгжигдмэл, ядуу зүдүү орнуудын нэг болсон тус улсын нийслэлд 16 жил нам гүм дүнсийсний эцэст дахин баригдаж эхэлжээ.
Пеньян хот дахь эх сурвалжийн мэдээлснээр, Египетийн Orascom групп саяхнаас тус хотод тэнгэр баганадан орших 330 метр өндөр 3 талт пирамид хэлбэр бүхий зочид буудлын барилгын дээд давхаруудыг шинэчлэн засварлаж эхэлсэн аж. Тус компанийнхан бетонон хананд нь шилэн хавтан суулгаж, холбооны антен зоосон хэдий ч хойд солонгосын албаныхан иргэдээ гар утас барихыг хориглосоор байгаа юм. Orascom группийн охин компани Orascom Telecom энэ төсөлд оролцож байгаа ч тодохой мэдээлэл өгөхгүй байгаа аж.
Тус зочид буудал 75 хэмийн налуу үүсгэн орших 3 жигүүрээс тогтоно. 3000 өрөөнөөс бүрдэх зочид буудлын орой дээр нь хяхтнах кран олон жилийн турш ашиглагдаагүй бөгөөд жуулчдыг тийш бараг очуулдаггүй байна.
Сөүлийн Ионсей их сургуулийн архитектурын профессор Ли Сан Жун, “Дизайн муутай барилга. Бага зэргийн билэгдлийн, монументаль шинж чанартай мөртлөө бүдүүлэг, нүсэр хийцтэй” хэмээн ярьж байна.
Коммунист Хойд Солонгос уг барилгыг 1987 оноос барьж эхэлсэн бөгөөд 1988 оны зуны олимпийн тоглолтыг зохион байгуулж эдийн засаг нь хэрхэн хурдацтай хөгжиж байгааг дэлхий нийтэд харуулах нь тодорхой болсон Өмнөд Солонгост жөтөөрхсөндөө барих болсон гэдэг.
Хойд Солонгосын Paektu Mountain Architects & Engineers-ийн бүтээсэн барилга ийнхүү сүндэрлэж эхэлжээ. Хойд Солонгосынхон тус зочид буудлын зургийг бахархал болгон шуудангийн маркан дээр гаргаж, хэвлэл мэдээллээр албан ёсоор сурталчилж байсан аж.
Ким Ир Сен уг барилгыг хараад байгуулсан улсынхаа төлөө мөрөөдөж байсан мөрөөдлийнх нь билэгдэл болно хэмээн үзэж байсан авч 1992 онд барилыг ажлыг зогсоосон байна. Гол туслагч ЗХУ задран унасанаар тус барилгад орж байсан санхүүжилт үгүй болсон байна.
Умард Солонгосын эдийн засаг 1990-ээд оноос гүн хямралд орохын хирээр энэхүү зочид буудлын барилга “Чөтгөртэй зочид буудал”, “хий үзэгдлийн зочид буудал” гэсэн хочтой болж тус улсын доройтлын билэгдэл болсон аж. Бас энэ зочид буудал хийцийн хувьд бат бэх баригдсан гэж байхад нөгөө хэсэг нь нурж унахад ойрхон байгаа хэмээн үзэж байгаа юм.
Өмнөд Солонгосын хэвлэл мэдээлэлд дурьдагдсанаас үзвэл, Ryugyong Зочид буудлын барилгыг барьж дуусгахад 2 тэрбум ам.долларын зардал гарах тооцоо гараад байгаа гэнэ. Энэ нь Хойд Солонгосын жилийн дотоодын нийт бүтээгдэхүүний 10 хувьтай тэнцэх үзүүлэлт юм байна.
АНУ-ын Калифорни мужийн техникийн их сургуулийн архитектурын тэнхимийн эрхлэгч Бруна Гиберти, энэ барилга өнөө үед хотууд хэрхэн хөрөнгөтэй болж буйгаа харуулахын тулд орчиндоо үл нийцсэн аварга байгууламжууд барих болсонтой нэг адил зүйл юм. Хэрвээ энэ зочид буудлын барилга дэлхий дээрхи хамгийн муу, муухай нь юм бол дараагийнх нь Вегас, Шанхайд байна” хэмээн өгүүлжээ.
“Ройтерс”-ээс бэлтгэсэн Э.Алтангэрэл