Баянгол дүүргийн III хорооны нутаг дэвсгэр 50 ду­гаар байрны ойролцоо энэ сарын 20-ны шөнө хэдэн хүн гэнэт газар ухаж эхэлжээ. Ингэхдээ хэдхэн хоногийн өмнө ашиглалтад оруул­сан хүүхдийн тоглоомын талбайг эвдэн, ухсан газраа төмрөөр хашжээ.

Тэр хавийн оршин суугчид ямар хүмүүс барилга барьж байгааг асуутал ажилчид нь мэдэхгүй гэснээс өөрийг хэлээгүй аж.Хүүхдийн тоглоомын тал­байгаа эвдүүлж, барилга бариулахгүй гэсэн иргэд газар ухах ажлыг нь зогсоохоор чулуу мод шидэж эхэлсэн байна. Тэгтэл нэр үл мэдэгдэх компанийнхан аль нэг хамгаалалтын албаныхнаар оршин суугчдыг авч шидэх зэргээр, биед нь халдсан гэнэ. Иргэд хүчин мөхөсдөж Баянголд дүүргийн цагдаагийн хэлтэст дуудлага өгсөн аж. Харин цагдаа нар "Энэ бол томчуудын асуудал. Бидэнд хамаагүй" гэчихээд яваад өгчээ.

Энэ талаар тус байрны СӨХ-ийн дарга Л.Батбаяр "Манай байрны ойролцоо ноднингоос эхлэн нүх ухаж эхэлсэн. Дулаан шугам сүлжээний газар Хамгаалалтын цогц төхөөрөмж байрлуулах нэрийн дор таван давхар барилга барих гэж байгаа гэсэн. Нийслэлийн Засаг даргын 2008 оны 18-ны өд­рийн 187 тоот захирамжаар газар олгосон байна лээ. Гүйцэтгэгч нь "Нэмүүт констракшн" гэдэг компани гэнэ лээ. Ингэхдээ оршин суугчдаас болон СӨХ-өөс зөвшөөрөл аваагүй. Газрын зөвшөөрлийг энэ жил авсан боловч ноднингоос эхлэн нүх ухаж эхэлсэн. Бид хүүхдүүдээ тоглуулах талбайд барилга бариулахгүй гэж ноднин ухсан нүхийг нь хүртэл булж байлаа. Түүнээс хойш сураггүй байсан. Гэтэл саяхнаас нүх ухаж эхэлсэн. Биднийг эсэргүүцнэ гэдгийг мэдсэн юм шиг хамгаалагчид авчирчихсан байна лээ. Тэд нар нь биднийг хөдөлгөхгүй, ойртохоор л авч шидээд байсан. Иргэнээ хамгаалах ёстой цагдаа нь компанийн ажилчдын бичиг баримтыг ч шалгаагүй. Тэдний хэлснээр томчуудынх учраас тоогоогүй байх. Ингэхээр Монголд хүний эрх гэж үгүй болжээ. Харин тэр мөнгөтэй компанид хууль үйлчилдэггүй бололтой. Бид тэр хүмүүстэй удаан тэмцэхийг хүсээгүй. Долдугаар сарын 1-нд болсон шиг биднийг буудчих байх гэж айсан.

Бид энэ асуудлыг дүүргийнхээ удирдлагуудад мэдэгдсэн. Дүүргийн Засаг даргын орлогч н.Амгалан, тохижилт үйлчилгээний хэлтсийн дарга н.Лхагвасүрэн нарын албаны хүмүүс манай байрны дэргэд барилга бариулахгүй гэсэн. Мөн оршин суугчид энэ барилгыг барихыг эсэргүүцэж Нийслэлийн мэргэжлийн хяналтын газарт хандсан" гэлээ.

Өдрийн сонин