Өнгөрсөн жил сая дахь иргэнээ хүлээн авсан нийслэл хотын нийт хүн амын 68 хувийг хүүхэд, залуучууд эзэлдэг. Иймээс хүүхэд, багачуудад олгох бага, дунд боловсролын хүртээмжийг сайжруулах үүднээс нийслэл хотод дахин 24 сургууль барихаар болжээ.
Олон улсын "Жайка" төрийн бус байгууллагаас санхүүждэг бага боловсролыг дэмжих төслийн хүрээнд өмнө нь Улаанбаатар хотод дунд сургуулийн 40 гаруй байр барьжээ. Харин энэ удаа бага, дунд боловсролыг дэмжих ажлын хүрээнд "Жайка"-гийн дөрвөн төслийн судалгааны баг манай улсад ирсэн байна. Тэд нийслэл хотод өргөтгөлийн 17, сургуулийн 24 байрыг шинээр барихаар төлөвлөж байгаа аж.
Нийслэлийн Засаг даргын орлогч Б.Баатарзориг болон Газрын албаны дарга , дүүргүүдийн Засаг даргын орлогч нар өнөөдөр уулзаж шинээр баригдах сургуулийн барилгын талаар санал солилцлоо. Манай улсын нийт хүн амын 58 хувь нь Улаанбаатар хотод амьдардаг, нийслэлийн хүн амын 68 хувийг 0-35 насны хүүхэд, залуучууд эзэлдэг. Энэ үүднээс хүүхэд, багачуудад хүргэх бага, дунд боловсролын хүртээмжийн асуудал нийслэл хотын бас нэг тулгамдсан бэрхшээл болоод байгаа юм. Харин энэхүү төсөл хэрэгжвэл хүүхэд багачуудын боловсролын тогтолцоонд багагүй өөрчлөлт гарна гэж албаны хүмүүс онцолж байлаа. Төсөл, хөтөлбөр ирэх жилээс эхлэн бодит ажил болох төлөвтэй.
МОНЦАМЭ