"Энүжин" ХХК-ийн хохирогчид тус компанийн захирал С.Энхтуяа болон гүйцэтгэх захирал И.Алтанхуяг нарт үүсгэн шалгаж байгаа хэргийг үнэн зөвөөр нь шуурхай шалгаж, хохирогчдыг түргэн хугацаанд хохиролгүй болгохыг шаардаж буйгаа хэвлэлээр дамжуулан мэдэгдлээ.
2003 онд СХД-ийн нэгдүгээр хороололд 96 айлын зургаан давхар орон сууцны барилгыг 94 монгол иргэн 1.25 сая ам.долларын урьдчилгаа өгч БНСУ-ын "Хааны зам Вако" компанитай гэрээ байгуулж бариулж эхлүүлсэн байна. Гэвч уг барилга 3-4 давхартаа хүрээд зогссоныг 2005 онд С.Энхтуяа захиралтай "Энүжин" ХХК үргэлжлүүлэн барьж хохирлыг нь барагдуулна хэмээн амлаж компанийнхаа нэр дээр болгуулж авчээ.
Хохирогчдын мэдэгдэж байгаагаар тус компани БНСУ-ын "Хааны зам Вако" компанийн үлдээсэн өрийг хариуцахаар гэрээ хэлцэл хийж дутуу барилгыг өөрийн болгож авсан аж. Гэтэл хохирч үлдсэн 94 захиалагчид олгох ёстой орон сууцныхаа 30 гаруйг шинээр давхар гэрээ байгуулан 480 гаруй сая төгрөг залилан авсан гэнэ. Ингээд зогсохгүй 96 айлын зургаан давхраар барих зураг төсөлтэй барилгыг ямар ч зөвшөөрөлгүйгээр долоон давхар 112 айлын орон сууц болгон өөрчилжээ. 96 хохирогчоос одоогоор ердөө 22 нь л заргалдаж хөөцөлдөж явсны эцэст хохирлоо барагдуулаад байгаа бөгөөд дөрвөн захиалагч нь захиалсан байрныхаа барааг харж чадалгүй хорвоогийн мөнх бусыг үзээд байна гэж хэвлэлийн бага хуралд ирсэн хохирогч иргэд хэлж байлаа.
МОНЦАМЭ