Засгийн газрын ээлжит хуралдаан болж , “Улаанбаатар хотын гэр хорооллыг орон сууцны хороолол болгон хөгжүүлэх” хөтөлбөрийг баталлаа.

Хөтөлбөрт Улаанбаатар хотын зургаан дүүргийн 22 гэр хороолол хамрагдах бөгөөд 2008-2011, 2012-2015, 2016-2020 он гэсэн гурван үе шаттай байх юм.

Эхний үе шатанд гэр хорооллуудын байршил, хүчин чадал, хэрэглээг тооцож, шаардлагатай хөрөнгө оруулалтыг төвлөрүүлж, эхний ээлжийн хорооллуудын хэсэгчилсэн ерөнхий төлөвлөгөөг хэрэгжүүлнэ.

Хоёрдугаар шатанд хотын төвийн гэр хорооллуудыг дэд бүтцийн бүрэн хангамжтай нийтийн орон сууцны хороолол болгон хөгжүүлэх барилгажилтын ажил эрчимтэй явагдана гэж үзэж байна.

Гурав дахь шатанд хотын дунд хэсгийн гэр хорооллуудыг дэд бүтцийн иж бүрэн хангамжтай, дунд давхрын орон сууц ба нам давхрын орчин үеийн амины орон сууцны хороолол, хотын захын гэр хорооллуудыг орон сууцны анхан шатны дэд бүтэц бүхий амины орон сууцны хороолол болгон хөгжүүлэх барилгажилтын ажил явагдахаар төлөвлөжээ.

1.Баянгол дүүргийн VII бичил хороолол, Гандан

2.Баянзүрх дүүргийн XIV хороолол, Зүүн Сэлбэ, Дарь-Эх, Улаанхуаран, Шар хад, Амгалан, Улиастай

3.Сонгинохайрхан дүүргийн Өнөр-II, Толгойт, Орбит, Ханын материал

4.Сүхбаатар дүүргийн VII хороолол, 32-ын тойргийн орчмын хороолол, 3-7 буудлын хороолол

5.Хан уул дүүргийн Яармаг, Нисэх

6.Чингэлтэй дүүргийн МҮОНРТ-ийн орчмын хороолол, Дэнжийн 1000, Хайлааст, Чингэлтэйн замын дагуух хороолол хамрагдах юм.