Чикаго хотын хот төлөвлөлтийн газар АНУ-ын хамгийн өндөр барилгыг барих саналыг хүлээн авчээ. Өнгөрсөн 4 сарын 19-нд буюу Пүрэв гарагт болсон хурлаар тус хотын төлөвлөлтийн комиссын шийдвэрээр “Спайр Тауэр”/Spire tower/ гэж нэрлэгдсэн 610 орчим метр өндөртэй уг цамхагийг барих газар болон дизайныг нь баталсан байна. Чикаго хотын хот төлөвлөлтийн газрын хэвлэлийн төлөөлөгч Констанс Бушеми, “Маш гайхалтай төсөл болсон. Хүн болгон үүнд сэтгэл хангалуун байгаа” хэмээн ярьжээ.
АНУ дахь хамгийн өндөр барилга болохоор төлөвлөгдсөн цамхаг нь 150 давхар бөгөөд 1200 гаруй өрөөтэй бөгөөд Нью-Йоркд Дэлхийн худалдааны цамхагийн оронд баригдаж буй “Эрх чөлөөний цамхаг”-аас ч өндөр болох аж. Уг цамхагийн зураг төслийг АНУ-ын Милуоки хотын урлагийн музейн өргөтгөлийг болон Афины олимпийн спорт цогцолборын зураг төслийг хийснээрээ алдаршсан Испани гаралтай архитектор Сантъяго Калатрава зохиожээ. Уг барилга нь газрын зөвшөөрлөө авч чадвал ирэх 5 сараас эхлэн баригдах бөгөөд 1 тэрбум гаруй долларын өртөгөөр босох юм байна.
Дэлхийн хамгйин өндөр цамхаг нь Тайваны “Тайпэй 101” цамхаг бөгөөд 1671 фут өндөр, 101 давхар бол одоо Дубайд баригдаж байгаа цамхаг нь 2300 гаруй футын өндөртэй, 160 орчим давхар байхаар төлөвлөгдөж байгаа ажээ.