Үнэгүй

Барилга МН

 
Дагах

Орон сууцны зээл авахад 30 гаруй төрлийн бичиг бүрдүүлж байна

Barilga Barilga
2019-11-05
Орон сууцны зээл авахад 30 гаруй төрлийн бичиг бүрдүүлж байна
Үзсэн: 1348
Орон сууцтай болохыг хүссэн иргэд олон ч одоо болтол тийм боломж гүйцэд бүрдээгүй байдаг. Нэг ёсондоо барилгын компаниуд, арилжааны банкуудад шулуулж гүйцдэг. Иргэдэд орон сууцны зээл олгоно гээд байсан нь тийм ч үр дүнтэй сайн ажил биш аж. ОССК-ийн ТУЗ-ийн энэ оны 2-р тогтоолоор "Иргэдэд олгох орон сууцны санхүүжилтийн зээлийн журам"-ийг баталжээ. Энэ журмын зээлийн нөхцөл, зээлдэгчийн шалгуурыг үндэслэн ОССК бондын эх үүсвэрээр Улаанбаатарт “Голомт", "Анод", "Капитал", "Улаанбаатар хотын банк"-аар дамжуулан иргэдэд орон сууцны зээлийг энэ оны 3-р сараас олгож эхлэв. Корпораци энэ оны зургадугаар сарын байдлаар нийт 222 иргэний зээл хүссэн материалыг хүлээн авч, 167 иргэнд зээлийн эрх нээж, 55 иргэний хүсэлтэд татгалзсан хариу өгчээ. Уг зээлд төрийн 119 албан хаагч, 48 иргэн хамрагдаж, нийт 2,8 тэрбумын зээл авчээ. Харин ОССК-ийн хяналтаар санхүүжилтийн журмын зарим шаардлагийг хангаагүй, хэт өндөр орлоготой, зээл олгодог байгууллагад ажилладаг зэрэг шалтгаанаар зарим иргэнд зээлийн эрх нээхээс татгалзсан гэнэ. Хөтөлбөрийн хүрээнд олгодог зээл жилийн 11 хувийн хүүтэй байгааг аудитийн явцад хийсэн судалгаанд оролцогчдын 65 хувь нь "өндөр" гэж, зээл авах бэрхшээлтэй эсэхийг асуухад 83,2 хувь нь тийм гэж хариулжээ. Орон сууцны үнэ огцом өссөн өнөөгийн нөхцөлд хөтөлбөрийн хүрээнд олгож байгаа зээлд төрийн албан хаагч хамрагдах боломжгүй байна. Жишээ нь нийслэлд нэг өрөө байр байршлаасаа хамаарч дунджаар 30,0-50,0 саяын үнэтэй болсон.

Тэгвэл судалгаанд оролцсон хүмүүсийн 14 хувь буюу 70 өрх л зээлд хамрагдаж 30,0-33,0 сая төгрөгөөр орон сууц худалдан авах боломжтой. Харин үлдсэн 430 өрх буюу 86 хувь нь зээл авах боломжгүй ажээ. Өөр нэг жишээ, 25,0 сая төгрөгийн зээл авсан иргэн сард хүүгийн төлбөрт 236,8 мянга, үндсэн зээлийн төлбөрт 109,9 мянга, нийт 346,7 мянган төгрөг төлөх тооцоо гарчээ. Хөтөлбөрийн зээлийн хүү арилжааны бусад банкны хүүгээс харьцангуй бага учир иргэдийн энэ зээлд хамрагдах хүсэл их байгаа ч өрхийн орлого нь зээл авах шалгуурт хүрэхгүй, орлогын түвшин, төлбөрийн чадвартай харьцуулахад уг зээлийн хүү үнэхээр өндөр" байгаа юм. Зээл авахад хүндрэл болдог шалтгааныг оролцогчдын дийлэнх буюу 72,3 хувь нь "Өрхийн орлого хүрэхгүй, урьдчилгаа төлбөрийг төлж чадахгүй, банкны шалгуур өндөр, бүрдүүлэх материал, шат дамжлага, хүнд суртал ихтэй" гэж хариулсан байна. Үнэхээр ч иргэд орон сууцны зээл авахын тулд 30 гаруй төрлийн бичиг баримт бүрдүүлж, нотариатаар баталгаажуулж байж харилцагч банкинд өгдөг ажээ. 30 гаруй баримт бичгийн дороос босох хэцүү нь үнэн билээ. Иймээс төрийн 45,3 мянган албан хаагчийг орон сууцаар хангах, тэдэнд хөнгөлөлт үзүүлэх, урт хугацаатай зээлийн тогтолцоог бүрдүүлэх төрийн нэгдсэн бодлого зайлшгүй хэрэгтэй байна.


“Өнөөдрийн тойм” сонин