Монголын Барилгын Инженерүүдийн Холбооны Удирдах зөвлөлийн гишүүн, Барилгын зураг төслийн «Цац суварга интернэйшнл» ХХК-ийн захирал, Монгол улсын Зөвлөх инженер Баасанхүүгийн Гантөмөр 2017 оны 2 дугаар сарын 1-ний өдөр хүнд өвчний улмаас таалал төгсөж, бидэнд нөхөж баршгүй хүнд гарз тохиолоо.
 
   Б.Гантөмөр нь 1976-1981 онд МУИС-ийн БАФ-ыг Барилгын конструктор инженерийн мэргэжлээр төгссөн. Тэрбээр Хөдөлмөрийн гараагаа 1981 оноос БХЯ-ны 30-р газар Цэргийн Барилгын Зургийн Институтэд барилгын зургийн ахлах техникчээс  Институтийн ерөнхий инженерээр ажиллаж эхэлсэн бөгөөд 1990-1995 онд зураг төслийн «Орд» пүүст ерөнхий инженерээр, нийтдээ цэргийн байгууллагад 15 жил, үүнээс 10 жилд нь офицерээр ажилласан бэлтгэл ахмад юм. 1996 -2000 онд зураг төслийн «А энд Х» ХХК-д инженерээр, 2000 оноос өнөөг хүртэл зураг төслийн «Цац суварга интернэйшнл» ХХК-д захирал, конструктор инженер, зөвлөх инженерээр ажиллаж байсан бөгөөд барилгын салбарт нийтдээ 34 жил ажилласан билээ.   

   Б.Гантөмөр нь 2001 оны 6 дугаар сараас 2015 оны 7 дугаар сар хүртэл Монголын Барилгын Инженерүүдийн Холбооны гүйцэтгэх захирлаар томилогдон, 14 жил тасралтгүй ажилласан байна. Тэрбээр МБИХ-ны гүйцэтгэх захирлаар ажиллаж байхдаа барилгын салбарт мөрдөгдөж байгаа норм дүрмийг шинэчлэх, сайжруулах ажилд санаачилгатай ажиллаж, 20 гаруй норм дүрэм, стандарт, журмын төсөлд өөрийн саналыг хүргүүлэн оролцож байсан төдийгүй мэргэжлийн маш олон ном, гарын авлага боловсруулах ажлыг хийж гүйцэтгэсэн. Мөн холбооны олон улсын хамтын ажиллагааг өргөжүүлэх, хөгжүүлэх үйлсэд өндөр хувь нэмрээ оруусан бөгөөд 2006 онд Азийн Барилгын Инженерүүдийн Зохицуулах Зөвлөлийн Гүйцэтгэх хорооны 13-р  хурлыг  баг хамт олноо удирдан Улаанбаатар хотноо амжилттай зохион байгуулж, АБИЗЗ-өөс өндөр үнэлгээ авч шагнуулж байсан юм.
 
   Б.Гантөмөр нь МБИХ-ны дэргэдэх Эрчим хүчний хэмнэлтийн төвийн үйл ажиллагааг удирдан, НҮБ-ийн Дулааны хэмнэлттэй хувийн орон сууцыг зах зээлд нэвтрүүлэх МОН/99/Ж35, Барилгын Эрчим Хүчний хэмнэлтийн МОН/09/301 төслүүдийг амжилттай хэрэгжүүлэхэд хувь нэмрээ оруулсан юм. Мөн мэргэжил нэгтнүүд, залуу инженерүүдийн оюуны хөгжил, мэргэжлийн өсөлтөд өөрийн мэдлэг чадвараа зориулан Барилгын Хөгжлийн Төвийн сургалт, шалгалтын үйл ажиллагаанд зөвлөхөөр 10 гаруй жил, Ногоон барилгын хүрээлэн ТББ-ын Удирдах зөвлөлийн гишүүн, “Барилга.МН” сэтгүүлийн редакцын зөвлөлд тус тус ажиллаж байсан билээ.
 
   Талийгаачийн улс орон, үндэсний бүтээн байгуулалтын хөгжилд оруулсан хувь нэмрийг үнэлэн «Тэргүүний барилгачин» цол тэмдэг, Барилгын салбар үүсч хөгжсөний 80, 90 жилийн ойн медалиудаар тус тус шагнаж байжээ.

   Талийгаачийн үндэсний барилгын салбарын болон Монголын Барилгын инженерүүдийн Холбооны хөгжлийн төлөө зүтгэсэн нөр их хөдөлмөр, шулуун шударга, ажилч хичээнгүй, нөхөрсөг зан чанар бидний сэтгэл зүрхэнд үүрд дурсагдах болно. 

   Түүний гэр бүл, үр хүүхэд, төрөл төрөгсөд, ах, дүү хамаатан садан, найз нөхдөд нь гүн эмгэнэл илэрхийлье. Ум сайн амгалан болтугай.