Сангийн сайдын энэ оны наймдугаар сарын 5-ны өдрийн 301 тоот тушаалын дагуу Засгийн газрын бондыг Монголын хөрөнгийн бирж /МХБ/-ийн үнэт цаасны арилжаагаараа маргаашнаас эхлэн арилжихаар болсон тухай хэвлэлийнхэнд дуулгалаа.

Нийтдээ таван тэрбум төгрөгийн 50 мянган ширхэг энэхүү бондыг "40 мянган айлын орон сууц" хөтөлбөрийн санхүүжилтийн эх үүсвэрийг бүрдүүлэх зорилготой арилжих юм байна. Нэг ширхэг үнэт цаасны үнэ нь 100 мянга бөгөөд 30 мянган ширхэг бондыг 95 мянга 231 төгрөгийн үнэтэй болгон хямдруулж 9.43 хувийн хүү тооцон, буцааж төлөх хугацааг нь 2009 оны тавдугаар сарын 2-нд, харин 20 мянган ширхэг бондыг нь 92 мянга 232 төгрөгөөр хямдруулан 10.24 хувийн хүүтэй олгож, буцаан төлөх хугацааг нь 2009 оны долдугаар сарын 5-нд байхаар тогтоожээ.

МХБ-ийн гүйцэтгэх захирал Р.Содхүүгийн хэлж буйгаар Засгийн газрын бонд буюу үнэт цаас гэдэг нь хөрөнгийн зах зээл дээрх хамгийн эрсдэлгүй хөрөнгө оруулалтын хэрэгсэл аж. Тиймээс бизнес, санхүүгийн чиглэлээр үйл ажиллагаа явуулдаг аж ахуйн нэгж байгууллагууд энэхүү эрсдэлгүй бондыг худалдан авснаар бизнес, санхүүгийн ашигтай алхам хийж байгаа хэрэг гэж үзэж болох юм байна.

Засгийн газраас энэ онд нийтдээ 80 тэрбум төгрөгийн бонд арилжаалах бөгөөд энэ удаагийнх хоёр дахь арилжаа нь болж байгаа аж. Засгийн газраас ийнхүү хямдруулсан өртөг бүхий үнэт цаасыг гарган арилжаалж, иргэдийн нэн тэргүүний хэрэгцээ шаардлага болж байгаа орон сууцны асуудлыг шийдэхэд тусламж дэмжлэг үзүүлж байгаад нийт Монголчуудынхаа өмнөөс баярлаж байгаагаа МХБ-ийн гүйцэтгэх захирал хэлж байлаа.