Өрнөд Европт барилга, орон сууцны үнэ ханш хамгийн өндөр тогтоосон хотоор Их Британий нийслэл Лондон хот тодорчээ. Эндхийн байр сууцны нэг ам.метр талбай дээд тал нь 22 мянга гаруй ам.доллараар үнэлэгдэж байгаа аж. Лондон хотын Челси дүүрэгт байрлалтай, долоон унтлагын өрөө бүхий сууцыг гэхэд эзэн нь 8,1 сая еврогоос эхлэн үнэ дуудах гэнэ.
Лондоны дараа Испани улсын нийслэл Мадрид үл хөдлөх хөрөнгийн салбарт үнийн шуурга дэгдээж байна. Мадридын хамгийн үнэтэй дүүрэгт нэг ам.метр талбайн үнийг 11,7 мянган ам.доллараар тогтоогоод байгаа гэнэ. Испаний нийслэлд хамгийн үнэтэй байр 5,4 сая еврогоор үнэлэгдсэнийг тус улсын үл хөдлөх хөрөнгийн наймаа эрхлэгчдийн холбооноос гаргасан мэдээнд дурьджээ. Саламанка дүүрэгт орших уг орон сууц 600 ам.метр талбайтай, унтлагын таван өрөөтэй. Энэ барилгыг Лондоны Челси дүүргийн барилгатай харьцуулахад талбайн хэмжээгээрээ ахиу байна.
Өрнөд Европын есөн томоохон хотод явуулсан үл хөдлөх хөрөнгийн зах зээлийн энэхүү судалгаанд зөвхөн хотын байрууд хамрагдаж, хөдөө орон нутаг, зах хязгаар байрлалтай эдлэн газар, ордон, шилтгээн багтаагүй байна.
Британий нийслэлийн үнэтэй байрнуудын ханш өнгөрсөн сард ихээхэн чангарч, урьд өмнө нь дуулдаагүй дээд ханш тогтоожээ. Блүмбергийн мэдээлснээр, үнийн шуурганд тус улсын оршин суугчдаас гадна Орос, Ойрхи Дорнодын орнуудаас хөл тавьсан гадны худалдан авагчид гол үүрэг гүйцэтгэжээ. Жилийн дүнгээр нь авч үзвэл, үнэ 32%-р нэмэгдсэн байгаа нь сүүлийн 28 жилийн хамгийн дээд ханш болжээ. Их Британий орон сууцны дундаж ханшнаас Лондоны тансаг хорооллын үл хөдлөх хөрөнгийн өртөг гурав дахин их хурдтай яваа нь энэ. Сүүлийн жилүүдэд Лондонд дэлхийн тэргүүн баячууд болох Лакшми Миттал, Роман Абрамович, Шарлин де Карвальо-Хайнекен нар үл хөдлөх хөрөнгө худалдаж авсан. Тэгвэл орон байрандаа найман сая фунтээс доошгүй хэмжээний мөнгө төлөгсдийн 23%-ийг Оросууд бүрдүүлж байгаа гэнэ. Үүгээрээ тэд Ойрхи Дорнодын баян Арабуудыг /13 хувь/ гүйцэж түрүүлэн, зөвхөн уугуул оршин суугч Британичуудын /37хувь/ ард бичигдэж байгаа аж.
Үл хөдлөх хөрөнгийн “Найт Фрэнк” брокерийн байгууллагын хийсэн тооцоогоор бол, Британий нийслэлд байшин барилгын үнэ 27 сарын турш тасралтгүй өсөөд байна. Энэ оны эхний улиралд байшингийн үнэ 10, орон сууцных 7,5 хувиар тус тус өсчээ. Энэ нь 24-с доош насны британичуудын дунд аав ээжтэйгээ нэг гэрт удтал хамтдаа амьдрах үзэгдэл “моод” болж хувирсны гол шалтгаан гэдгийг таамаглахад төвөггүй. Үндэсний статистикийн газрынх нь мэдээгээр, өнгөрөгч онд 20-24 насны эрчүүдийн 58 хувь нь эцгийн гэрт “толгой хорогдож” суусан нь 1991 оныхтой харьцуулахад 50 хувиар өссөн үзүүлэлт болсон гэнэ. Охид бүсгүйчүүдийн хувьд энэ нь 32-с 39 хувь болтлоо өёчээ. Нөгөө талаар, банкнаас олгож хөнгөлөлттэй зээл болон гадны худалдан авагчдын эрэлт хэрэгцээнд хөтлөгдсөн Их Британий үл хөдлөх хөрөнгийн зах зээлийн цэцэглэлт дундаж Британи иргэдийг байр сууцаа өндөр үнээр худалдах “шуналд” хатгаж буй нь ортой гэнэ.
Тэгвэл манай хойд хөршийн нийслэлд хамгийн үнэтэй байр нэг ам.метр нь 24650 ам.долларын ханштай байна. Москва-ситигийн орон сууцны шинэ хороололд барьж байгаа агвар сайтай хаусууд ам.метр нь 25 мянган “ногооноор” үнэлэгдэж зарагдана гэж шинжээчид тооцоолсныг үзвэл Баруун Европын хотуудыг мөд гүйцэх нь бололтой.