Спортын 39 төрлөөр уралдаан тэмцээн болж, 10500 тамирчин 302 багц шагналын төлөө өрсөлдөнө. 2008 оны наадмыг дэлхийн телевизийн 200 гаруй компани мэдээлэх бөгөөд манай гаригийн дөрвөн тэрбум гаруй үзэгч олимпийн уралдаан тэмцээнийг үзнэ.

Наадмын нээлтийн албан ёсны ёслол өнөөдөр 2008 оны наймдугаар сарын 8-ны оройн 8 цаг 8 минут 8 секундэд /УБ-ын цагаар мөн адил - орч,./ эхэлнэ. Албан ёсны баяр ёслолын хэсгийн өмнө ардын хөгжим, бүжгийн 75 минутын концерт тоглох бөгөөд түүнд нийт Хятад орны уран бүтээлийн 28 хамтлаг оролцох ажээ.               

Наадмын нээлтийн ёслол нь хоёр хэсэгтэй байх юм. Эхнийх нь нэг цаг орчим үргэлжлэх бөгөөд олон хүн оролцсон гоё сайхан тоглолтоос бүрдэнэ. Энэ үеэр 2008 оны олимпийн наадмын сүлд дуулал эгшиглэж, үүнийг Британийн нэрт дуучин эмэгтэй Сара Брайтман, Хятадын поп-од Лю Хуань нар дуулах юм.