Монгол Улсын Засгийн газраас өргөн мэдүүлснээр УИХ "Ажиллах хүч харилцан солилцох тухай Монгол Улсын Засгийн газар, БНАСАУ-ын Засгийн газар хоорондын хэлэлцээр"-ийг 2007 оны долдугаар сарын 20-ны өдөр соёрхон баталсан билээ.

Уг хэлэлцээрт дурдсаны дагуу Монгол Улсын Нийгмийн хамгаалал, хөдөлмөрийн яам БНАСАУ-ын Гадаад худалдааны яамтай хэлэлцээрийг хэрэгжүүлэх асуудал болон харилцан солилцох ажиллах хүчний тоог ойрын үед тохиролцох юм байна.

Тодруулбал, ажиллах хүчний тоо, хэрэгцээ, олгох цалин хөлсний доод хэмжээ /ам.доллараар/, хөдөлмөрийн нөхцөл /хэвийн, хэвийн бус/, нийгмийн хамгаалал /нийгмийн даатгал/ зэрэг асуудлыг Солонгосын талтай удахгүй тохиролцохоор болжээ. Иймээс ажилчин авах хүсэлтэй байгууллагууд ажлын байрны захиалгаа нягт нямбай боловсруулж өгөх шаардлага тавьж буй аж.

Ирэх онд БНАСАУ-аас ажиллах хүч авах хүсэлтэй аж ахуйн нэгжүүд саналаа боловсруулж Үйлдвэр, худалдааны яаманд энэ сарын 23-наас өмнө ирүүлэх ёстой юм байна. Одоогоор төчнөөн ажилчин авна гэсэн тоо заагаагүй, ажлын байрны санал дээр тулгуурлаж захиалгаа өгөх гэнэ.

МОНЦАМЭ