ХААН, Монгол шуудан, Хас банкны удирдлагууд Монголбанктай хамтран ажиллах, зээлдэгчийн мэдээлэл солилцох гэрээ байгууллаа.

Арилжааны банкууд хөдөө орон нутагт салбар нэгжээ байгуулж, зээлийн үйлчилгээ үзүүлж эхэлснээр байгууллага иргэд банк, санхүүгийн үйлчилгээг хүртэх нь нэмэгдэж, өрх болон бизнесийн үйл ажиллагааг санхүүжүүлэх, олон банкны өрсөлдөөний үр дүнд зээлийн хүү буурах зэрэг олон сайн тал ажиглагдаж байгаа ч зээлийн зүй бус давхардал ихээр үүсэх болжээ. Өнгөрсөн нэг жилийн хугацаанд Монголбанкны мэргэжилтнүүдийн хийсэн шалгалтаар арилжааны банкууд зээлийн эрсдэлд орох нь өмнөх жилүүдээс ихэссэн тул ийм гэрээ хийхэд хүрсэн байна. Уг гэрээнд банкуудын өрсөлдөөнийг зөв урсгалаар явуулах зорилгоор зээлийн зүй бус давхардлыг арилгах, зээлдэгчийн талаархи мэдээллийг харилцан солилцох, хамтран ажиллах талаар тусгажээ.

Одоогоор манай улсын банк санхүүгийн салбарт 16 арилжааны банк, 131 банк бус санхүүгийн байгууллага, 181 тусгай зөвшөөрөл бүхий хадгаламж зээлийн хоршоо үйл ажиллагаа явуулж байгаа аж.