Нийслэлийн засаг дарга бөгөөд Улаанбаатар хотын захирагч Т.Билэгт захирамж гарган зургаан иргэн аж ахуйн нэгж, байгууллагын газар эзэмших эрхийг хүчингүй болголоо.
Нийслэл, дүүргийн засаг даргын газар олголт нь давхацсан, зориулалтын бусаар ашигласан, газрын төлбөрөө төлөөгүй зэрэг шалтгаанаар Баянгол дүүрэгт Ч.Жаргалсайхан, "Талын Монгол групп", "Шинэ Очир"ХХК-ийн, Сүхбаатар дүүрэгт "Мон-Уран"ХХК, "Хөгжим бүжгийн коллеж", А.Зоригтсайхан нарын газар эзэмших эрх цуцлагдаж байгаа ажээ.
Энэ оны 06 дугаар сарын 13-нд Нийслэлийн Засаг дарга бөгөөд Улаанбаатар хотын захирагч болон Монголын сууц өмчлөгчдийн холбоодын дээд зөвлөлийн ерөнхийлөгч Б.Жигжид нар долоон чиглэл бүхий харилцан ойлголцлын санамж бичигт гарын үсэг зурсан юм.
                Энэхүү санамж бичгийн хүрээнд оршин суугчид болон СӨХ-доос гаргаж буй санал, хүсэлтийг харгалзан нийтийн зориулалттай орон сууцны орчны газар, хүүхдийн тоглоомын талбай, ногоон байгууламж дээр газар эзэмшүүлэхээр олгосон захирамжуудыг эргэн харж, судлан зөрчилтэй заримыг нь хүчингүй болгох ажлыг зохион байгуулж байгаа ажээ.