Үргэлжлэн орсон борооны улмаас хэд хэдэн газар зам эвдэрчээ. Ус зайлуулах шугамгүй, нөхөөс хийхээс өөрөөр арчилгаа хийдэггүй хэмээн холбогдох байгууллагуудыг шүүмжилдэг. Замын эвдрэл болон засварын талаар Нийслэлийн авто замын газрын дарга Д.Бат-Эрдэнээс тодруулсан юм.

-Борооны улмаас олон газар зам эвдэрчээ. Ус зайлуулах шугамгүй болохоор тэр үү?
-Улаанбаатар хотод хатуу хучилттай 400 гаруй км зам байдаг. Үүний 80 гаруй хувийнх нь ашиглалтын хугацаа дууссан. Хуучин замуудыг борооны ус зайлуулагчгүй барьсан байдаг юм. Нэмж тавина гэхээр шугам тавих хоолойгүйгээс ус тогтдог. Угаасаа ашиглалт нь дууссан зам борооны усанд идэгдэж, цөмөрч эвдэрдэг.

Харин сүүлийн жилүүдэд барьсан зам борооны ус зайлуулах шугамтай болохоор эвдрэх нь бага байгаа.

-Зам засах гэж нөхөөс тавьсан болоод өнгөрдөг. Ийм нөхөөс  цөмөрч байна гэсэн шүүмжлэл бий. Үнэхээр нөхөөс муу хийснээс зам цөмрөөд байна уу?
-Нөхөөс харьцангуй үр дүнтэй болдог. Гэсэн ч нөхөөс сайн хийлээ гээд замын чанар сайжрахгүй шүү дээ. Хуучин тэрлэгийг нөхсөн ч өөр газраараа урагддагтай адил. Хуучирсан хар зам борооны усанд дэвтэж, машин явахаар эвдэрдэг. Үүнийг хүмүүс нөхөөс муу болсон мэтээр ярьдаг. Мөн барилга барих нэрийдлээр зам сэтлэх нь эвдрэх нөхцөлийг бүрдүүлдэг. Сэтэлсэн газраа элс, шороогоор дүүргээд нүд хуурчихдаг. Ингэснээр борооны ус нэвчиж замын доод хэсгийг идэж, цөмрөх шалтгаан болдог.

-Хаана хаана зам цөмөрсөн бэ?
-Наадамчдын замд, Цагаан хаалганы баруун талд, Б.Доржийн гудамжинд, “Их засаг” их сургуулийн зүүн талд инженерийн шугам сүлжээн дээр зам цөмөрсөн. Мөн Толгойтын замд УБЦТС, Амгалангийн зам, Чулуун овоотын цагдаагийн постны хажууд “ЭКО констракшн” компани зөвшөөрөлгүй зам сэтэлснээс цөмөрсөн.

-Цөмөрсөн замаа яаж зассан бэ. Ямар нэг тэмдэг тавьсан уу?
-Эхний ээлжинд шороогоор дүүргээд орхисон. Дараа нь нөхөн сэргээлт хийнэ. Тэмдэг тавиагүй ээ.

-Замын ашиглалтын хугацаа дууссан талаар олон жил ярьж байгаа. Үндсээр нь шинэчилж болдоггүй юм уу?
-Бүх хуучин замыг шинэчилнэ гэвэл их хэмжээний хөрөнгө шаардлагатай. Дор хаяж 300 гаруй тэрбум төгрөг шаардлагатай гэсэн тооцоо бий. Улаанбаатар хотын замыг орчин үеийн шаардлагад нийцүүлэх үүднээс энэ жилээс гүүрэн гарц барихаар төлөвлөсөн. Эхний ээлжинд уулзвар, тойргуудад барих юм. Ингэж чадвал замын ачаалал багасч, хуучин замаа ч шинэчлэх боломж бүрдэнэ.