Эрчим хүчний зохицуулах газар /ЭХЗГ/-аас эрчим хүчний тусгай зөвшөөрөл эзэмшигч компаниудын цахилгаан, дулаан үйлдвэрлэх, дамжуулах, түгээх, хангах тариф болон төвийн бүсийн хэрэглэгчдэд борлуулах эрчим хүчний тарифт өөрчлөлт оруулахаар шийдвэрлэжээ.

ЭХЗГ-ын өчигдөр болсон 26 дугаар хуралдаанаар шинэ тарифийг долдугаар сарын 15-наас мөрдүүлж эхлэхээр шийдвэрлэжээ. Уг шийдвэрээр айл өрхөд борлуулах цахилгааны тарифийг нийслэлийн орон сууцны айл, гэр хорооллын өрх болон аймаг, сумдын айл өрх гэж ангилж дотор нь гурван шатлалаар тариф тогтоожээ. Тухайлбал, орон сууцны айл сард 150 хүртэл кВт/цаг нь 60 төгрөг, 151-250 хүртэл кВт/цагийн хэрэглээтэй бол 64 төгрөг, 251-ээс дээш бол 68 төгрөг байх аж. Гэр хорооллын айлд энэ шатлалаар 58, 62, 66 төгрөг байх юм байна. Мөн үйлдвэр, аж ахуйн нэгж, бусад байгууллагад борлуулах цахилгааны тариф ч өөрчлөгджээ. Цахилгаан эрчим хүчний үнэ долдугаар сарын 15-наас дунджаар 28 хувиар өсөх бол дулааны үнэ 39 хувиар өсч байгаа аж.