Үүнээс эхний ээлжинд Баянгол дүүргийн 11 хорооны нутаг дэвсгэр дэх 2.6 га газрыг чөлөөлөх юм байна. Шугам сүлжээний ажил ч эхэлжээ. Энд эхний ээлжинд 0.45 га газрыг барилгажуулахаар нийслэлийн Засаг даргын 248 дугаар захирамж гарч барилга угсралтын ажил эхлэхэд бэлэн болжээ.
        Хүн бүрийн анхаарлын төвд байж, гэр хорооллынхныг сонирхлыг төрүүлж буй нэг зүйл бол газар чөлөөлөх асуудал. Сүхбаатар дүүргийн 11 дүгээр хороонд барих орон сууцны хорооллын эхний ээлжийн ажил эхэлж, барилга барих газраа шав тавьсан байгаа. Шав тавьсны дараахан тэндхийн оршин суугчид эсэргүүцэл илэрхийлж, хэвлэлийн хурал зарласан юм. Тэд нэг хашаанд амьдардаг айлуудын асуудлыг хэрхэн шийдвэрлэх, барилга ашиглалтад ортол хаана амьдрах, гурван өрөөтэй байшинд амьдарч байсан айлд хоёр өрөө байр өгөх нь шударга бус гэсэн шаардлага тавьж байв. Тэгвэл энэ бүхнийг нэг тийш нь шийдэж чаджээ. Өөрөөр хэлбэл, өөрийнхөө газар дээр барилга барихаар санаачилга гаргасан иргэдийг дэмжихээр болсон байна. Үүний дараа шат дараатай арга хэмжээ авч, бусад айлын газрыг авах талаар зөвшилцсөн аж. Газрын хувьд жинхэнэ эзэмшигчтэй гэрээ хийхээр болжээ.
        Энэ хавьд орон сууцны VII хороолол босох бөгөөд Сүхбаатар дүүргийн 9, 10, 11, 12 дугаар хорооны 210 га газар хамрагдана. Уг хороолол босох газар нь Ногоон нуур орчим бөгөөд хөрсний усны түвшин дээр байрладаг болохоор ус шүүрүүлэх шугамыг өнгөрсөн жилээс тавьж эхэлсэн юм.   Хөрсний ул усыг газрын хөрсөн доогуур шүүрүүлж, Туул гол руу цутгахаар төлөвлөжээ.
        VII хорооллын хэсэгчилсэн төлөвлөгөөг "Бадмаараг төсөл" компани гүйцэтгэсэн байна. Төлөвлөгөө ёсоор бохир усны 25 дугаар коллектор, дулааны VI магистрал шугам сүлжээтэй холбох бэлтгэл ажил эхэлжээ. Угсралтын ажлыг гүйцэтгэх аж ахуйн нэгжүүдтэй гэрээ байгуулсан байна. Улаанбаатарын агаарын бохирдолд голлох үүрэг гүйцэтгэдэг дээрх газруудад орон сууцны хороолол сүндэрлэвэл наанадаж, хорт утаа багасч эрүүл амьдрах нөхцөл бүрдэх юм. Цаашилбал, хог шорооноос салж, олон мянган иргэн орчин үетэй хөл нийлүүлэх боломжтой болно.