Сэлэнгэ аймгийн Хөтөлийн "Цемент шохой" ХХК-ийн инженер техникийн ажилтнууд өөрсдийн хүчээр үйлдвэрийнхээ нэгэн шинэ шугамыг ашиглалтад оруулах гэж байна.

Тус үйлдвэрийн удирдлагууд үйлдвэрийнхээ технологийг шинэчлэх ажлыг хоёр жил гаруй хугацаанд эрэлхийлж, ОХУ, Хятад зэрэг орны туршлагыг судалсан байна. Оросуудад үйлдвэрээ шинэчилж, ажиллахгүй байгаа шугамыг ажилд оруулж өгөх тухай санал тавихад 16 сая доллараар нэг шугамыг нь ажилд оруулж өгнө гэсэн хариу авчээ. Ингээд өөрсдөө хийхээр зориг шулуудан дөрвөн сая доллараар босгох боломж байгааг олж харсан байна. Ажил эхлээд хоёр сар болж байгаа ч цахилгааны монтажийн ажил 90, засвар механикийн ажил 60 хувьтай байгаа аж. Ийм том ажлыг монгол инженерүүд, мэргэжлийн ажилчид хийж чадсандаа баяртай байна хэмээн үйлдвэрлэл эрхэлсэн захирал Д.Баатаржав ярилаа.

Шинэ шугам ашиглалтад орсноор цементийн үйлдвэрлэлийн хэмжээ 2-2.5 дахин нэмэгдэх юм байна.