7сарын 1-нд болсон эмх замбараагүй байдал, үймээний үеэр илүү харж ашиг хонжоо хайгчид үймээн далимдуулан дээрэм тонуул хийсний улмаас эд материалын ихээхэн гарз хохирол учраад байгаа билээ.

МАХН-ын төв байр, түүний эргэн тойронд байрласан төрийн болоод төрийн бус, хувийн байгууллагуудын хаалга үүдийг эвдлэн дайран орж, хувийн өмчид халдах, галдан шатаах балмад үйлдэл ихээр гарсан. Хохирол амссан газрын дотор Үндэсний түүх соёлын эд өлгийн зүйл олноор алга болсон эмгэнэлтэй хэрэг гараад байгаа. Түүнээс гадна Монголын Архитекторчидын холбооны байрны эд зүйл бүгд тоногдсон бөгөөд одоо зөвхөн дөрвөн хана л үлдсэн гэхэд болохоор байна. Энэ сарын 1-ний шөнийн 02 цагийн үед үймээн дэгдээгч этгээдүүд Архитекторчидын холбооны байр уруу дайрч хулгай хийсэн бөгөөд гарахдаа түймэр тавин хэргийн газраас ул мөрөө балласан байна. Дээрэм хийсэн гэмт этгээдүүдийн гарт 50 гаруй жилийн түүхтэй Архитекторчдын оюуны үнэт зүйл, архив алдагдаж, үлдсэн нь ул мөргүй шатаж үгүй болжээ. Одоогийн байдлаар хохиролын хэмжээг хараахан бүрэн тогтоогоогүй байна.