Монгол Улсын эрчим хүч хэрэглэгч ахуйн болон аж ахуйн нэгж, компани, байгууллагуудын үнэ тариф олон улсын дунджаас 30-52 хувь доогуур байна гэсэн дүгнэлтийг АНУ-ын Олон улсын хөгжлийн агентлаг /ОУХА/-аас гаргасан байна.

                Эрчим хүчний зохицуулах газар /ЭХЗГ/-аас цахилгаан, дулааны үнийг энэ сарын 15-наас нэмэгдүүлэх шийдвэр гаргасан. Энэхүү шийдвэрийг гаргахдаа Монгол улсын эрчим хүчний салбарыг арилжааны хэлбэрт шилжүүлэх, санхүүгийн тогтвортой байдлын талаар олон улсын байгууллагуудаас гаргасан зөвлөмжүүдээс үнэ тарифтай холбогдсон дүгнэлтийг нь судлаж тусгасан байна.

                АНУ-ын ОУХА-ийн зөвлөхүүд нь манай улсын эрчим хүчний салбарыг санхүүгийн хүнд байдалд байгаа бөгөөд засах арга хэмжээг цаг хугацаа алдалгүй авахгүй бол сөрөг үр дагавар бий болно гэж дүгнэж байгаа аж. Иймд эрчим хүчний эцсийн хэрэглэгчийн тарифыг нэмэгдүүлэх зайлшгүй шаардлага байна. Энэ салбарын санхүүгийн бие даасан байдлыг бататган найдвартай арилжааны зохих түвшинд хүргэхэд хэрэглэгчийн үнэ тарифын өсөлт шууд нөлөө үзүүлнэ гэж зөвлөж байгаа юм. Дэлхийн банк болон Азийн хөгжлийн банк ч энэ зөвлөмжтэй санал нэг байгаа гэдгээ илэрхийлсэн дүгнэлтийг гаргасан байна.