“Эгийн голын УЦС-ын тухай” асуудлыг хэлэлцээд УЦС-ыг барьж байгуулах гүйцэтгэгч компанийг шалгаруулах тендерийг зарлах, УЦС-ын төслийг хэрэгжүүлэх бэлтгэл ажлыг хангах үүрэгтэй ажиллаж байсан Сангийн дэд сайд Ч.Ганзориг ахлагчтай ажлын хэсгийг Үнэлгээний хороо болгон шинэчлэн зохион байгуулахыг Сангийн сайд Н.Баяртсайхан, Түлш, Эрчим хүчний сайд Б.Эрдэнэбат нарт зөвшөөрөх нь зүйтэй гэж үзлээ.
Станцыг барьж байгуулах ажлыг БНХАУ-аас олгох 300 сая ам.долларын хөнгөлөлттэй зээлийн хөрөнгөөр гүйцэтгэх юм. УЦС-ын техник, эдийн засгийн үндэслэлийн нарийвчилсан тооцоог ТЭХЯ-ны мэргэжилтнүүд хийгээд байна. Төслийн зөвлөхүүдийг сонгон шалгаруулах тендерийг гадаадын 10 компаний дунд зарлаж, Зөвлөхөөр Швейцарийн “Пойри” компани шалгарчээ. УЦС-ын байгаль орчинд нөлөөлөх нарийвчилсан үнэлгээнд тодотгол хийж, боловсруулах компанийг сонгон шалгаруулж, Гүйцэтгэгч “Енко” компани ажилдаа ороод байна. Энэхүү төсөл нь Монгол улсын эрчим хүчний бие даасан байдлыг хангахад стратегийн чухал ач холбогдолтой, үндэсний аюулгүй байдалд эерэг нөлөөтэй бүтээн байгуулалт болох юм.