Ботаникийн цэцэрлэгт хүрээлэнг ногооруулах төслийг эхлүүлжээ

Нийслэл хотод хийгдэж байгаа бүтээн байгуулалтын ажилтай нийслэлийн Засаг дарга танилцжээ.

Долдугаар хороолол шинэ замтай боллоо

Саяхан л нийслэлд шинэ зам тавих нь битгий хэл хуучнаа ч сэргээх гэсэн зүйл байдаггүй байлаа.

Харин өнөөдөр хэд хэдэн шинэ зам тавигдлаа. Хуучин замыг сэргээхэд ч чамлахааргүй хөрөнгө зарцуулдаг болж. Мартагдах шахсан орон сууцны хороолол дундах зам их засварт орох болов. Нийслэлийн Засаг дарга бөгөөд Улаанбаатар хотын захирагч Т.Билэгт Сүхбаатар, Баянгол, Хан-Уул дүүрэгт тавигдаж байгаа зам засварын ажилтай танилцсан. Сүхбаатар дүүргийн 10 дугаар хороонд нэг км хатуу хучилттай зам тавигдаж байна. Улаанбаатар хотыг 2020 он хүртэл хөгжүүлэх ерөнхий төлөвлөгөөнд Сүхбаатар дүүргийн Ногоон нуурын орчим буюу долоодугаар хороололд орон сууцны иж бүрэн хороолол баригдах юм. Гэр хорооллыг барилгажуулах бүтээн байгуулалтын ажлыг эхлүүлсэн бөгөөд энэхүү төлөвлөлттэй уялдуулан шинэ замыг тавьж байгаа аж. Замын ажлын гүйцэтгэгчээр нь “Наранбулаг” компани ажиллаж байна. Шинэ замыг өнөөдөр улсын комисст хүлээлгэн өгөх юм. 200 сая төгрөгийн өртөгтэй шинэ замыг ердөө нэг сарын хугацаанд барьж дуусгаж байна. Төв цэнгэлдэх хүрээлэнгийн орчмын Гандийн нэрэмжит замын өргөтгөлийг наадмын өмнө дуусгана. Зураг төсөлд нь өөрчлөлт орсноос болж энэ онд зам засварын ажил үргэлжилжээ. Машин явахад давчуухан байсан уг зам сэлүүхэн болсон байна. Мөн нийслэлийн хөрөнгө оруулалтаар Баянгол дүүргийн 19 дүгээр хороолол дундах зам ч өнгөө зассан байлаа.

Дэлхийн жишигт нийцсэн спортын талбай байгуулжээ

Өндөр хөгжилтэй орны хөлбөмбөгийн талбайнх шиг зүлэгтэй хөлбөмбөгийн талбай нийслэлийн нэгэн сургуульд байна. Зүлгийг нь урд хөршөөс оруулж иржээ. Ингэхдээ хамгийн сайн чанартай нь. Зүлэг үйлдвэрлэдэг компани нь зуны Бээжингийн олимпын наадмын зүлэгт ногоон талбайг бэлтгэж байгаа гэнэ. Мөн олон оронд бүтээгдэхүүнээ нийлүүлдэг байх юм. Нийслэлийн Засаг даргын санаачлагаар спортын иж бүрэн хүүхдийн талбай байгуулах эхлэл нь 97 дугаар сургуулиас эхэлжээ.  Зарубежстрой компани Монголын хөл бөмбөгийн холбоо, нийслэлийн Өмчийн харилцааны газраас спортын талбайг байгуулсан аж.

Дэлхийн стандартад нийцсэн талбайг байгуулахын тулд эхлээд хөрсөн дээр нь хайрган тэгшлэгээ, бетонон, элсэн давхарлага хийж, зүлгээ дэвсчээ. Зүлгээ дэвссэний дараа тусгай зөөлөвч тавьсан байна.

Хөлбөмбөгөөс гадна сагсан бөмбөгийн талбайг байгуулж. Удахгүй 100 метрийн гүйлтийн замыг тавих гэнэ. Спортын энэхүү талбайг байгуулахад 150 сая төгрөг зарцуулсан бөгөөд ашиглалтад хамгаалалтыг 97 дугаар сургууль хариуцна. Зүлэгт талбай арчилгаа маш их шаарддаг аж. Байнгын цэвэрлэж байхын зэрэгцээ, цаснаас хамгаалж байх хэрэгтэй гэнэ. Хиймэл зүлэг доод тал нь таван жилийн  баталгаатай. Ийм спортын талбайг төвийн бусад таван дүүргийн нэг нэг сургуульд нийслэлийн хөрөнгө оруулалтаар байгуулах юм байна. Спортын талбайн гэрэлтүүлгийг өндөр түвшинд хийж өгчээ. Тус спортын талбайд дан ганц 97 дугаар сургуулийн сурагчид бус тухайн орчны айл өрхийн хүүхдүүд тоглох боломжтой юм байна.

Ботаникийн хүрээлэн ногоон төгөл болно

Нийслэлд томоохон хэмээх тооцогдох цэцэрлэгт хүрээлэн бий болов уу? Нэлээд хэдэн жилийн өмнө Ботаникийн цэцэрлэгт хүрээлэн л байсан гэх хүн олон бий. Мод бус хүнсний ногоо тариалах талбай болгочихсон байсан нь саяхан. Харин Ботаникийн цэцэрлэгт хүрээлэн өнгөө засч эхэллээ. Ботаникийн хүрээлэнгийн хамт олон энэ жилээс эхлэн дөрвөн жилийн хугацаатай төсөл хэрэгжүүлж байгаа аж. Дөрвөн жилийн дараа тус хүрээлэн төрөл бүрийн мод, цэцэгтэй ой болох нь ээ. Энэ онд л гэхэд 8.2 га талбайн таван хэсэгт 19800 ширхэг мод, 27 нэр төрлийн ургамал суулгаж, арчилж байна. Таван хэсгийн нэг л гэхэд шинэс, нөгөө нь хус модны төгөл байх жишээтэй. Тус хүрээлэн нь нийт 32 га талбайтай бөгөөд ногоон байгууламжийн дундуур явган хүний зам, амарч тухлах болон үйлчилгээний газар байгуулагдахаар төлөвлөсөн аж. Хүрээлэнгийн голд хиймэл нуур хүртэл байх гэнэ. Хотын мэр энэхүү ажлыг ихэд дэмжиж, хотын уушги болсон ногоон байгууламж сэргэж байна хэмээлээ.

СӨХ-д бичил цэцэрлэгийг хүлээж авахаас татгалзах болжээ

Сүхбаатар дүүрэг Улсын драмын эрдмийн театрын өмнөх талбайг шинэчилжээ. Өнгө, өнгийн цэцэгс алагласан нь сайхан харагдаж байв.

Сонгинохайрхан дүүрэг гурван газарт бичил цэцэрлэг байгуулж. Тус дүүргийн Эрүүл мэндийн нэгдлийн өмнөх талбайн цэцэрлэгийн голд усан оргилуур байрлуулжээ. Сүүдрэвч, сандал, хогийн сав, байгалийн чулуун чимэглэл гээд тэнд дутуу зүйл алга. 50 сая төгрөгөөр боссон яг ийм цэцэрлэг тус дүүргийн Барилгачны гудамжид бий. Баянгол дүүргийн тухайд энэ жил есөн газарт бичил цэцэрлэг байгуулсан байна. Үүний нэг нь есдүгээр хорооных. Уг нь хороолол дундах бичил цэцэрлэгийг тухайн Сууц өмчлөгчдийн холбоо харж, хамгаалах учиртай. Гэтэл олон сая төгрөг, хүч хөдөлмөр зарцуулан байж байгуулсан бичил цэцэрлэгийг Сууц өмчлөгчдийн холбоо хүлээн авахдаа хойрго хандах болж. Учир нь харуул хамгаалалтыг нэмэх, усан оргилуурын цахилгааны төлбөрийг хэн хариуцах гэсэн асуудлыг Сууц өмчлөгчдийн холбооныхон энэ үеэр тавьж байв. Сууц өмчлөгчдийн холбооны дээд зөвлөл, нийслэлийн Засаг даргатай орчны  нийтийн эзэмшлийн зам талбайг эзэмших гэрээ байгуулж байна. Энэхүү гэрээгээр нийтийн эзэмшлийн зам талбайн эд хөрөнгө тус газрын мэдэлд байна гэсэн үг.  Мөн Баянзүрх дүүргийн хэн 16 дугаар хороонд бичил цэцэрлэг байгуулсан байна. Энэхүү цэцэрлэгийг 48 сая төгрөгөөр босгожээ.

Хүй долоон худагт дэлгэц байрлуулна

Хотын дарга  наадмын бэлтгэл ажилтай энэ өдөр танилцсан. Төв цэнгэлдэх хүрээлэнд хүндрэлтэй гэх асуудал алга. Сурын шинэ байр, шагайн асар ашиглалтад ороход бэлэн болжээ. Хүй долоон худагт наадмын үйлчилгээг Сонгинохайрхан дүүрэг зохион байгуулна. Ойр орчмын цэвэрлэгээг тус дүүргийн Тохижилт үйлчилгээний компани хийсэн байна. Энэ жил Хүй долоон худагт “Цолмон трейвэл” компани гадаадын жуулчдад зориулан 400 хүний багтаамжтай сандал нэмж байрлуулжээ. “Их харанга” компани 8:50 метрийн хэмжээтэй дэлгэц байрлуулна. Төв цэнгэлдэх хүрээлэнгийн нэгэн гоёо нь дээшээ 52 метр өндөр, 21:9 метр төрийн далбаа намируулах юм байна. Өмнөх жилүүдэд Төв цэнгэлдэх хүлээлэнгийн зүлгийг ургуулахын тулд байнга усалдаг байлаа. Энэ жилийн тухайд ногоон дэвжээний зүлгийг тайрах хэмжээнд ургасан байна.

Улаанбаатар Таймс