УИХ болон Засгийн газрын гүшүүн, Барилга хот байгуулалтын сайд Ж.Наранцацралт, Нийслэлийн засаг дарга бөгөөд Улаанбаатар хотын захирагч Н.Батбаяр нар “40000 орон сууц” хөтөлбөрийн хүрээнд Улаанбаатар хотноо баригдах хорооллын төлөвлөгөөнд гарын үсэг зурлаа. Энэхүү хөтөлбөрийн хүрээнд 2007 онд 4000 орон сууц баригдах ажээ. Харин ирэх онд 11.5 мянга, 2009 онд 15.8 мянган айлын орон сууц барихаар төлөвлөөд байгаа юм байна. Тус орон сууцнууд нь СХД-ийн 1-р хороо Баянголын аманд 2009 он гэхэд 20,000, ХУД 8-10 дугаар хороо, Нисэхийн цагаан хаалганы орчимд 10,000, мөн ХУД–н 4-7 дугаар хороо, Нисэх Яармагийн замын урд талд 4,5 мянга, Баянзүрх дүүргийн 11-р хороо Ногоон зоорийн зүүн талд 1,8 мянга, мөн БЗД-н 6-р хороо, Нарны замын урд талд 5 мянган айлын орон сууц гэсэн төлөвлөлтийн дагуу баригдах гэнэ. Уг төлөвлөлтөнд гэр хорооллыг дахин төлөвлөж орон сууцны хороолол болгон барилгажуулах, инженерийн шугам сүлжээний эх үүсвэрийг дахин шинээр тавих ч асуудал багтаж байгаа юм байна. Тодорхой шийдэлд хүрээгүй нэлээд хугацааг өнгөрөөсөн “40,000 орон сууц” хөтөлбөр ийнхүү анхны алхамаа хийлээ. Сайд, Мэр хоёр үзэглэж байна гэдэг хэрэгжинэ гэсэн үг хэмээн иргэд таатайгаар ярьцгааж байна.